Ҳасбулла Магомедов — 2 йил ичида жаҳон юлдузига айланган доғистонлик 20 ёшли блогер. Интернетда у Ҳасбик номи билан танилган ва митти кавказлик болакайнинг видеолари ижтимоий тармоқларда миллион марталаб кўрилмоқда.
Дунё юлдузлари ҳам Ҳасбик билан дўст — Шакил ЎНилдан тортиб Ҳабиб Нурмагомедовгача. Магомедов Forbes журналининг 30 ёшгача бўлган энг истиқболли россияликлар рўйхатига кирди. Яқинда аралаш яккакураш бўйича асосий промоушен — UFC Ҳасбик билан шартнома имзолади.
Дунёни забт этган кичик блогер Ҳасбекнинг сири нимада?
Ҳасбик қулупнай ҳақидаги вирусли видеодан сўнг Доғистонда юлдузга айланди.
2020 йилда Доғистонда блогер пайдо бўлди — Ҳасбулла Магомедов. Йигитча 18 ёшда бўлса ҳам болага ўхшарди: унинг бўйи бор-йўғи 93 сантиметр, вазни 18 килограмм эди. Ҳасбулланинг овози жуда баланд бўлиб, фойдаланувчилар меҳрини қозонди.
Доғистонлик йигитча қулупнай еган видеоси билан машҳур бўлди. Айтарли бирор нарса бўлмаса-да, видео қандай қилиб вирусга айланиши мумкин? Аммо видеода Ҳасбулла машҳур бўлиб кетган иборани айтади: «Ростини айтсам, қулупнай бомба. Қулупнайни жуда яхши кўраман».
Видео ижтимоий тармоқларда тарқалди ва машҳур бўлди, Магомедов эса ватанида юлдузга айланди.
Биринчи муваффақиятдан сўнг Ҳасбик тармоқда тез-тез пайдо бўла бошлади. Ҳасбулла — блогер, лекин у ҳеч қачон ўзини видеога олмаган. Ҳасбик атрофида унинг ҳаётини камерага тушириб, йигитчани қўлларида кўтариб, совға-саломлар бериб юрадиганлар кўп.
Ҳасбикнинг атрофидагилар ҳақида кўп нарса маълум эмас. Тахминларга кўра, унинг энг яқин дўсти Магомед бўлиб, у нафақат унга уй ишларида ёрдам беради, балки видеода ҳам тез-тез кўриниб туради.
Ажабланарлиси, Ҳасбикнинг продюсери йўқ, унинг кўтарилишида дўстларининг хизмати катта. Шундай вақтлар бўлдики, Ҳасбикнинг влоглари ижтимоий тармоқларни тўлдириб, миллион марталаб кўрилди. Дўстлари Ҳасбикнинг ҳаётини суратга олишди, блогер эса контент яратди. Фойдаланувчиларни ҳатто Ҳасбикнинг машина ҳайдаш усули ҳам ҳайратда қолдирди ва унинг жумлалари машҳур бўлиб кетди.
Бироқ Ҳасбикнинг ота-онаси ўғлининг севимли машғулотларига қарши эди, улар ўғлига тинчроқ келажакни хоҳлашарди. Уларни жуда тез пайдо бўлган хейтерлар янада кўпроқ қўрқитарди. Аммо Ҳасбик машҳурликни ёқтирарди ва у оиласи учун мустақил пул ишлаб топишни истарди.
Ҳамма Ҳасбикнинг ўзига хос шахс эканини тушунди, у шу сабабли машҳур бўлди. Аммо блогернинг ўзи касаллиги ҳақида гапиришни ёқтирмайди. Магомедовнинг сўзларига кўра, шифокорлар ирсий ўзгаришларнинг сабабини аниқлай олмаган ва аниқ ташхис қўйишмаган.
Мен ўзимни ногирон деб ҳисоблайманми? Йўқ, мен бундай деб ўйламайман, лекин ота-онам шундай деб ўйлашади. Шифокорлар ҳам. Менда фақат ўсиш билан боғлиқ муаммолар бор. Тез юрганимда эса чарчаб қоламан. Ақлим 18 ёшларникидек. Бошқа 18 ёшли болалар менга ҳасад қилишади, чунки улар уйда ўтириб, пул топишни хоҳлашади, лекин қўлидан келмайди, — дейди Ҳасбик.Абдурозик билан омадсиз жангидан кейин дунё Ҳасбикни севиб қолди
Қулупнай ҳақидаги видеодан кейин Ҳасбикнинг машҳурлиги пасайишни бошлади. Аммо кейинчалик унинг ҳаётида Асхаб Тамаев пайдо бўлди — Ҳасбикни ўз канали учун суратга тушишга таклиф қилган чечен блогери.
Тамаев интернет тенденциялари қандай ишлашини яхши биларди, унинг ўзи ҳам ғайриоддий кўриниши билан ҳайратда қолдирарди. Тармоқда Асхаб чеченистонлик Ҳалк номи билан машҳур бўлиб, блогер, айниқса, бир пайтлар 56 см га етган катта бўйни билан ҳайратда қолдирарди.
Асхаб митти доғистонлик ва яна бир «одамча» — тожикистонлик 17 ёшли қўшиқчи ва блогер Абдурозик ўртасида муштлашув уюштиришга қарор қилади. Абдурозик ҳам Ҳасбикка ўхшаш ўлчамга эга эди, шу туфайли ҳам интернетда машҳур бўлиб кетганди: Абдурозик гўдакка ўхшарди, лекин шу билан бирга у яхши қўшиқ куйлар ва чиройли кийиниб юрарди.
Ҳасбик ва Абдурозик ўртасидаги жанг 2021 йилнинг баҳорида эълон қилинганди. Митти блогерларининг матбуот анжумани ижтимоий тармоқларни портлатиб юборди. Россиядан ғайриоддий дуэл шон-шуҳрати Ғарбгача етиб борди, UFC жангчилари ва ҳатто промоутерлик раҳбари Дуэйн Уайт Ҳасбик ва Абдурозикнинг видеоларини репост қила бошлади.
Бироқ жанг бўлмади: гўё Ҳасбикни кўндиришолмаган. Шартлар оддий эди: ҳар бири бир дақиқадан икки раунд. Умуман олганда, Тамаев Ҳасбик ва Абдурозикка зарбаларсиз курашадиган грапплинг жангини таклиф қилганди.
Тамаев икки-уч ой ичида уни миллионер қилишга ваъда бериб, Ҳасбикни янада руҳлантирмоқчи бўлди. Аммо Ҳасбик яхшигина гонорарни рад этди: эҳтимол, кўнгли ўзи пул ишлай олишини сезгандир. Ва бу тўғри қарор эди — тез орада Ҳасбик бутун дунёга танилди. Блогер фаол интервью бера бошлади.
Ҳасбик миллионлаб пул ишлади ва UFC билан шартнома имзолади
Абдурозик билан муваффақиятсиз жанг Ҳасбуллоҳни янада машҳур қилди. Бутун дунё блогер ҳақида билди ва кичкина одамчаларнинг видеолари ижтимоий тармоқларни портлатиб юборди. Шубҳасиз, бундан кейин Ҳасбик янги имкониятларга эга бўлди, гонорари ҳам сезиларли даражада ошди. Бироқ доғистонлик учун бурилиш нуқтаси Абу-Дабидаги UFC 267 га саёҳат бўлиб, у ерда MMA оламини забт этди.
Турнир 2021 йил октябрь ойида бўлиб ўтди, Ҳасбик у ерга УФС президенти Дуэйн Уайтнинг шахсий таклифига биноан келди. Блогер Доғистондаги кўпчилик каби аралаш яккакурашни яхши кўрарди ва республиканинг машҳур жангчилари: Ҳабиб Нурмагомедов, Ислом Махачев, Забит Магомедшарипов ва бошқалар билан дўст эди.
Абу-Дабида Ҳасбик турнир бошланишидан олдин ҳам бир қанча вирусли видеоларни суратга олди. Блогер ҳазиллашиб, собиқ UFC чемпиони Дэниэл Кормьенинг юзига «кутилмаган» зарба берди. Уайт билан ҳам кўриниш берди, залда ҳам видео суратга олди – Абу-Дабига келган Абдурозик билан жанжаллашиб қолишига сал қолди.
Турнирда Ҳасбикка октагон рўпарасидаги биринчи қатордан махсус жой берилди. Доғистонлик Ислом Махачев асосий кардда жанг қилди. Ден Хукерни мағлуб этгандан сўнг, у Ҳасбикни октагонга олиб чиқди ва боши узра кўтарди. Турнирда бўлган Махачевнинг яқин дўсти Ҳабиб эса блогерни елкасига миндириб олди.
Шов-шувли гастролдан кейин Ҳасбик «мини-Ҳабиб» лақабини олди — Ғарбда папах кийган ҳар қандай доғистонлик Нурмагомедов билан ассоцация қилинади.
Турнирдан сўнг UFC раҳбари Уайт Ҳасбик иштирокидаги видео унинг ижтимоий тармоқларида энг оммабопи бўлганини тан олди: «6,7 миллион обуначим бор ва улардан 6,4 миллиони ушбу видеони томоша қилган. Ақл бовар қилмайди!»
UFC билан ҳамкорлик қилгандан сўнг, Ҳасбикнинг карьераси ўсди ва у долларлик миллионерга айланди. Жорий йилнинг апрель ойида Forbes журнали Россиянинг 30 ёшгача бўлган энг истиқболли юлдузлари рейтингига кирувчи номзодларни тақдим этди — Ҳасбик ҳам рўйхатга кирди.
Худди шу ойда блогер NFT портретларидан 160 миллион рубль ишлаб олди. Актёрлар, мусиқачилар ва спортчилар образидаги Ҳасбик тасвирларининг сотуви декабрь ойида бошланган. Тўрт ойдан камроқ вақт ичида у 590 дона Ethereum (ўша пайтдаги курс бўйича тахминан 2 миллион доллар) қийматидаги 1700 та асар сотди.
Сентябрь ойида эса Ҳасбик UFC билан беш йиллик шартнома имзолагани маълум бўлди. Ҳамкорлик фақат оммавий ахборот воситаларида ишлашни, шу жумладан, турнирларга ташриф буюришни назарда тутади. Ҳасбик образи эса янги UFC симуляторига қўшилиши режалаштирилган.
Ҳасбик Конордан у билан жанг қилишни талаб қилди
2019 йилда ирландияликни мағлуб этган Ҳабиб билан бўлган жанги туфайли Ҳасбик Доғистондаги кўпчилик каби Макгрегорга ёмон муносабатда бўлган. Шу боис Ҳасбик Уайтдан Конор билан жанг ташкил қилишни сўраган.
«Ҳозир UFC билан шартномам бор. Агар МакГрегор ҳақиқатан ҳам эркак бўлса, Абу-Дабида кўришамиз. Уни Ҳабиб аллақачон енгган. Менимча, Конорнинг Мейвезер билан жангидан олган пуллари тугаган, энди унга кўпроқ эътибор керак», — деб ёзади Ҳасбик.
Албатта, Ҳасбик ва МакГрегор ўртасидаги жанг доғистонликларнинг UFC’даги одатий жанги каби бўлмайди: соғлиғи сабабли Ҳасбикка рухсат берилмайди. Ҳар бир турнир олдидан жангчилар пухта текширувдан ўтади, спорт комиссиялари уларни ҳатто соғлиғидаги кичик муаммолари учун ҳам рингга чиқармайди. Шунинг учун Ҳасбикни UFC’да жангчи сифатида кўрмаслигимиз аниқ, лекин у албатта турнирларда қатнашади.
Катта эҳтимол билан UFC ва Ҳасбик ўртасидаги ҳамкорлик янада муваффақиятли бўлади. Ахир, дунё доғистонлик блогерни севади. Бу араб минтақаларига ҳам тегишли — UFC кўпинча Абу-Дабида турнирлар ўтказади, у ерда Кавказдан келган россиялик жангчилар кўпчиликни ташкил қилади. Бироқ Ҳасбикнинг фаолияти шарқ мамлакатлари билан чегараланиб қолиши даргумон — катта эҳтимол билан UFC у учун каттароқ режалар тайёрлаётган кўринади.
Мавзуга доир:
Изоҳ (0)