Лондон Қироллик суди икки йил аввал шаҳардаги миллионерларнинг хонадонларидан 26 миллион фунт стерлинг (34 миллион доллар) миқдоридаги бойликларни ўғирлаган уч нафар Италия фуқароси устидан ҳукм ўқиди. Бу ҳақда Daily Mail хабар берди.
Нашр маълумотларига кўра, Югослав Йованович, Алессандро Мальтезе ва Алессандро Донати исмли шахслар Буюк Британия тарихидаги энг йирик ўғриликларни содир этиб, машҳурларнинг уйларидан миллионлаб фунт стерлинг пул, заргарлик буюмлари ва қимматбаҳо тошларни ўмаргани учун Islevort Crown Court судида 28 йиллик қамоқ жазосига ҳукм қилинган.
«Формула-1» собиқ бош раҳбарининг қизи Тамара Экклстоун, «Челси»нинг собиқ футболчиси Фрэнк Лэмпард ва аввалроқ вафот этган таиландлик миллиардер Вишая Шривадданапрабхининг уйлари 2019 йилда содир этилган бир қатор талончиликлар қурбони бўлган. Ушбу ўғирликлар Британия жиноят тарихидаги энг йириги деб аталади.
Йованович, Мальтезе ва Донати Италиядан экстрадиция қилинган. Улар 2019 йил 29 ноябрдан 18 декабргача бўлган даврдаги учта талончилик билан боғлиқ ўғриликларни амалга ошириш учун тил бириктирганига иқрор бўлди. Эркаклар судга қуролли полиция қўриқчилари кузатуви билан вертолётда олиб келинган. Буюк Британияда жиноят иши бўйича суд жараёни тугагандан сўнг улар жазони ўташ учун Италияга қайтарилади.
Қароқчилар жиноят жойида бармоқ излари ёки ДНК намуналарини қолдирмаган, шунинг учун полиция уларни «арвоҳлар тўдаси» деб атаган. Полиция 1000 дан ортиқ такси ҳайдовчилари билан суҳбатлашгандан кейингина жиноятчиларнинг изига туша олди.
Аввалроқ АҚШда энг кўп қидирилган ўғрилардан бирининг шахси 50 йилдан кейин аниқланган эди. Теодор Конрад 1969 йилда банкда ишлаган ва 215 минг доллар (ҳозирги қийматда 1,6 миллион доллар) ўмарган. Эркакни жавобгарликка тортишнинг иложи бўлмади: у май ойида саратон касаллигидан вафот этган.
Изоҳ (0)