Путин, Алиев, Трамп ва дунёдаги бошқа давлат раҳбарларининг қизлари қандай соҳада фаолият юритади?

Маликалар — сиёсий раҳбарларнинг меросхўрлари қироллик протоколисиз давлат ишида оталарига ёрдам беради ва йирик лойиҳаларни ўзлари бошқаради.

Мария Путина — Россия президенти Владимир Путиннинг тўнғич қизи

Россия президентининг меросхўри ҳақида ишончли маълумотлар кам. Мария Санкт-Петербург университетининг биология ва тупроқшунослик факультети ва Москва давлат университетининг фундаментал тиббиёт факультетини тамомлаган. Гарчи курсдошлари уни ҳеч қачон аудиторияда кўрмаганликларини даъво қилган бўлса-да, баъзи ўқитувчилар якшанба кунлари у билан бирга дарс ўтганини айтган. Мария гормонларни бошқарадиган эндокрин тизимга ихтисослашган биомедицина билан шуғулланади. Шунингдек, 2015 йилда Lambert Akademik Publishing нашриёти томонидан чоп этилган болаларда идиопатик паст бўйли китобнинг ҳаммуаллифидир. Мария Москвадаги Соғлиқни сақлаш вазирлигининг Эндокринологик тадқиқот марказида ишлайди. Қолаверса, у эндокрин касалликларга чалинган болаларга ёрдам берадиган «Альфа-Эндо» хайрия дастурини бошқаради.

Мария Путина голландиялик тадбиркор Йоррит Фаассенга турмушга чиққан. У Гаага университетида архитектура бўйича таҳсил олган ва кейин Россияда муваффақиятли карьера қурди. 2007 йилнинг ноябрь ойидан Фаассен «Газпромбанк-Инвест» ва «Газпром Интернешенл» компанияларида ишлаган ва уч йил олдин Мария Путина ва унинг турмуш ўртоғи Нидерландияга кўчиб ўтгани ҳақида хабар берилган эди. Миш-мишларга кўра, Мария 2012 йилда ўғил туғган.

Екатерина Тихонова – Россия президенти Владимир Путиннинг кенжа қизи

Екатерина 30 ёшда, у Германияда туғилган, Санкт-Петербург давлат университетини тамомлаган. 2015 йилда Екатерина Москва давлат университетининг «илмий ва технологик водий» концепциясини ишлаб чиқишда иштирок этган «Миллий интеллектуал ривожланиш» жамғармасининг раҳбари бўлгани ҳақида маълумот пайдо бўлди.

Бундан ташқари, Екатерина акробатик рок-н-ролл билан шуғулланади. Швейцарияда бўлиб ўтган жаҳон чемпионатида Тихонова ва унинг шериги бешинчи ўринни эгаллади. Екатерина, шунингдек, Бутунроссия акробатик рок-н-ролл федерацияси васийлик кенгашининг раиси ва Бутунжаҳон рок-н-ролл конфедерациясининг (WRRC) маркетинг ва ривожланиш бўйича вице-президенти. Екатерина Тихонова Владимир Путиннинг дўсти Николай Шамаловнинг ўғли Кирилл Шамаловга турмушга чиққан. Кирилл Шамалов «Газпром», «Рособоронэкспорт», «Газпромбанк» ва ҳукумат аппаратида ишлаган.

Иванка Трамп – АҚШнинг собиқ президенти Дональд Трампнинг катта қизи

Ёшлигида Иванка модель бўлишни режалаштирган. 1997 йилда у Seventeen ўсмирлар журналининг муқовасида пайдо бўлди, кейин суратга олиш ва шоуларда иштирок этди. Кейинчалик, Иванка бизнес фойдасига моделлик карьерасидан воз кечди ва 2017 йил март ойидан бошлаб у отасининг ёрдамчиси бўлди. Бундан ташқари, Иванка «Трамп картаси: ишда ва ҳаётда ғалаба қозониш» китобини ёзган.

Иванка миллионер Жаред Кушнерга турмушга чиққан, унинг уч фарзанди бор: бир қиз ва икки ўғил. Иванка АҚШнинг собиқ президенти Билл Клинтоннинг қизи Челси Клинтонни ўзининг энг яқин дўсти деб билади. Аммо 2016 йилда қизлар ота-оналари – Дональд Трамп ва Ҳиллари Клинтоннинг сайловолди даврида алоқани тўхтатди.

Тиффани Трамп – АҚШнинг собиқ президенти Дональд Трампнинг кенжа қизи

Тиффани – Трамп ва унинг иккинчи хотини Марли Мейплизнинг қизи. 2016 йилгача Тиффани Пенсильвания университетида социология ва шаҳаршунослик факультетида таҳсил олган. Тиффани Гарвардда ўқишни давом эттиришга қарор қилди ва у ерда ҳуқуқшуносликка эътибор қаратди. Тиффани мусиқага қизиқади. 2014 йилда Тиффани «Like a Bird» қўшиғини ёзди, бу ҳозирча унинг рэпертуаридаги ягона тарона. Тиффанининг нигериялик миллиардер Майкл Буглос билан муносабатлари жиддий.

Барбара Берлускони – Европа парламенти депутати Сильвио Берлусконининг қизи

Болалигида Барбара вокал, пианино ва актёрликни ўрганган. Кейин у фалсафага қизиқиб қолди ва Сан-Раффаеле хусусий университетида ўқишни бошлади. Ҳозирда у «ФинИнвест» директорлари аъзоси ва «Милан» футбол клуби вице-президенти лавозимини эгаллаб турибди.

16 ёшида Барбара ўзининг бўлажак турмуш ўртоғи, бизнесмен Жоржио Валагуцса билан учрашди, уларнинг икки нафар фарзанди бор. Миш-мишларга кўра, Барбара ва Екатерина дугона.

Алиса Мэри Хиггинс – Ирландия президенти Майкл Хиггинснинг қизи

Алиса отасининг изидан борди. У сиёсий таҳлилчи ва мустақил сиёсатчи. Шунингдек, Ирландия Миллий аёллар кенгашининг раҳбари ва Европа аёллар лоббиси бошқарув кенгаши аъзоси. 2016 йилда Алиса Ирландия Сенатига сайланган. Хиггинс Дублин университет коллежида инглиз тили ва фалсафадан дарс беради.

Кинга Дуда – Польша президенти Ажей Дуданинг қизи

Кинга Краковдаги Yagellon университетининг ҳуқуқ факультети талабаси. 2015 йилда отасининг сайловолди вақтлари Кинга учун жуда қийин бўлди, чунки университетда имтиҳонлар худди шу даврга тўғри келди. Кинга Facebookда фаол ва баъзи сиёсатшуносларнинг фикрича, у ижтимоий тармоқларда отасини қўллаб-қувватлаб, сайловчиларга катта таъсир кўрсатади.

Си Минцзэ –Хитой Халқ Республикаси раиси Си Цзиньпиннинг қизи

Си Минцзэнинг онаси сопрано хонанда Пэн Лиюандир. Си Гарвард университетини тамомлаган, у ерда психология ва инглиз тилини ўрганган. Талабалар шаҳарчасида Си сохта ном остида яшаган. Уни Хитойдан келган хавфсизлик хизмати ходимлари қўриқлаётгани ҳақида миш-мишлар тарқалган. 22 ёшида Си Хитойга қайтиб келган ва ҳозир Пекинда яшайди. Си мода ва адабиётга қизиқади. 2008 йилда Си Ханванга жўнаб кетди ва кўнгиллилар билан бирга зилзила қурбонларига ёрдам берди.

Лейла Алиева – Озарбайжон президенти Илҳом Алиевнинг тўнғич қизи

Лейла ёшлигида  Швейцария ва Буюк Британиядаги хусусий коллежларда таҳсил олган, 2008 йилда эса Алиева МГИМО магистратурасини тамомлаган.

Лейла ҳамма нарсада қобилиятли кўринади. Президентнинг меросхўри фильмлар суратга олади, шеър ёзади, расмлар чизади, «Баку» журналини чоп этади. Унинг бобоси Ҳайдар Алиевга бағишланган «Элегия» шеъри Озарбайжонда бешинчи синф адабиёти дарсликларига киритилган.

2006 йилдан 2015 йилгача Лейла мусиқачи ва Crocus Group вице-президенти Эмин Агаларов билан турмуш қурган. Эр-хотиннинг Али ва Микоил исмли ўғиллари бор эди, ажрашгандан кейин Лейла Амина исмли қизни асраб олди.

Алия Назарбоева – Қозоғистоннинг собиқ президенти Нурсултон Назарбоевнинг уч қизининг кенжаси

37 ёшли Алия опаларидан фарқли равишда сиёсатга қизиқмайди. Швейцария, Англия ва АҚШда ўқиганидан сўнг Алия ўзини турли соҳаларда синаб кўрди. Назарбоева «Evropa Plus» радиосида директор ёрдамчиси бўлган, TuranAlemBankning юридик бўлимида ва отасининг котиби лавозимларида ишлаган.

Ҳозир Алия шахсий фитнес клубига эга ва «Элитстрой» қурилиш компаниясини бошқаради. Иккинчи турмушида – футболчи Дониёр Хасенов билан Алия Тиара ва Алсара исмли қизларни дунёга келтирди. Ҳозир Назарбоева учинчи турмуши, «Казтрансоил» ОАЖ бош директори Димаш Дўсанов билан яшайди.