Москвада 22 июль куни тадбиркор ва йирик IT-компания “ИКС Холдинг” раҳбари Антон Черепенников 40 ёшида вафот этди. Ўлимнинг дастлабки сабаби юрак хуружи экани айтилмоқда. Бу ҳақда “РБК” хабар берди.
Антон Черепенников 1983 йил 7 майда Москвада туғилган. У болалигидан видео ўйинлар ишқибози бўлган, 15 ёшида компьютер клубларига боришни бошлаган. Бауман номидаги Москва давлат техника университетининг Ахборот хавфсизлиги бўлимида ўқиган. 2008 йилда Москва давлат қурилиш университетини тамомлаган.
Тадбиркор икки марта турмуш қурқан. Биринчи турмушидан Антоннинг бир қизи ва бир ўғли бор. Черепенников ажралиш сабаби бизнес ва кўп вақтни оладиган бошқа лойиҳалар эканини таъкидлаган. У 2015 йилдан бери иккинчи турмуш ўртоғи билан яшаган.
Черепенников турли йилларда Россиядаги энг муваффақиятли ёш тадбиркорлар рўйхатига киритилган. 2023 йил февраль ойи охирида Черепенников АҚШнинг қора рўйхатига, кейинроқ эса Украина санкциялари рўйхатига киритилган.
Ўйин бизнеси ва Алишер Усмонов билан алоқа
2003 йилда Черепенников Virtus Pro киберспорт компаниясига асос солди. У Cоunter Srike бўйича ўйинчилар жамоасидан иборат бўлган, кейинчалик унга бошқа ўйинлар қўшилган.
2015 йилда Антон Черепенников ўша пайтда NABI клубига эгалик қилган Александр Кохановский билан биргаликда ESforce киберспорт холдингини яратди, унга бир қатор бошқа киберспорт активлари қаторида Virtus Pro клуби ҳам киради.
Ўша пайтда миллиардер Алишер Усмонов Virtus Pro киберспорт жамоасига 100 миллион доллар сармоя киритди. Кейинчалик, асосий акциядорлари Усмонов тузилмалари бўлган Mail.ru Group бизнесни 100 миллион долларга сотиб олди.
Антон Черепенниковнинг бизнеси кўпинча Алишер Усмонов билан боғлиқ эди — у уларни миллиардердан сотиб олган ёки активларини унга сотган. Бироқ 2019 йилда “Ведомости” нашрига берган интервьюсида Черепенников Усмонов билан ишлаганидан ғурурланса-да, уни “Усмоновнинг киберспорт бўйича ҳамкори” деб доимий тилга олишларидан жуда чарчаганини айтган.
Киберспорт бизнесининг ривожланиши билан бир қаторда, Черепенников CORM компанияларидан иборат “Ситадел” холдингини тузди.
Унинг биринчи хариди МFI Soft компанияси бўлиб, у CОRМ’нинг энг йирик етказиб берувчиси ҳисобланади. Битим суммаси 10 миллиард рублдан ортиқни ташкил этди, бунинг учун пул Черепенниковга USM Group (Алишер Усмоновга тегишли) тузилмалари томонидан қарз сифатида берилган.
Хариддан бир йил ўтгач, 2018 йил бошида Черепенников ушбу кредитни Сбербанкда қайта рўйхатдан ўтказди. Кредитнинг банкда қайта расмийлаштирилишини Черепенниковнинг Усмоновдан “кўпроқ мустақил” бўлиш истаги билан изоҳланади.
Бироқ, Усмонов ва Черепенников тузилмалари ўртасидаги яқин ҳамкорлик давом этди.
2018 йилнинг март ойида Усмонов томонидан бошқариладиган MegaFon оператори биринчилардан бўлиб “Ситадел” томонидан ишлаб чиқилган “Яровая қонуни” доирасида маълумотларни йиғиш ва сақлаш тизимларини синовдан ўтказиш ҳақида хабар берди.
Кейин Усмонов жамоасининг асосий топ-менежерларидан бири Сергей Солдатенков MegaFon бош директори лавозимини тарк этгач, дарҳол унинг директорлар кенгашига қўшилди.
Шу билан бирга, Черепенников бошқа компаниялар гуруҳини — IKS Holding ни ташкил қила бошлади. Ҳозир холдинг 30 га яқин технологик компанияларни, жумладан “KNS Grup” (Ядро бренди), “Бюро 1440” (глобал сунъий йўлдош туркумини яратишни режалаштирмоқда) ва бошқаларни бирлаштиради.
2020-2021 йилларда “USM Telecom”, IKS Holding эгаси бўлган, унинг 80 фоизи, ўз навбатида, Алишер Усмоновнинг USM Group компаниясига тегишли эди. 2022 йил бошида USM IKS Holding ни Антон Черепенниковга сотди. Битим суммаси ошкор қилинмади.
Путин элитасининг вакили
Британиянинг Daily Mirror нашри Россия мухолифатидаги манбасига таяниб, Черепенников “мутлақо Путин репрессияларининг асосий қуроли” бўлганини, бунинг учун у бир пайтлар АҚШ санкциялари остида қолганини ёзади.
“Унинг ўлдирилишини инкор этиб бўлмайди, чунки Россиядаги давлат хавфсизлик аппарати муваффақиятсиз урушдан умидсизланиб бормоқда”, — деди манба.
Шунингдек, британияликлар Черепенников Путин элитасининг сўнгги икки кун ичида вафот этган иккинчи вакили эканини таъкидламоқда. Бунгача собиқ ҳукумат амалдори, миллиардер олигарх Игор Кудряков вафот этганди. У Москвадаги квартирасида ўлик ҳолда топилган.
Изоҳ (0)