Илон Маск 2027 йилга келиб тарихда биринчи триллионер бўлиши мумкин. Келажак ҳақида юксак ғояларга берилган, инновациялар сари интилувчи бу даҳо мураккаб характери билан ҳам танилган. Унинг ҳаёти ва фаолияти ҳақида китоб ёзиш учун Уолтер Айзексон Маск билан икки йил вақт ўтказади. Уолтер Айзексон китобидаги Илон Маскнинг болалиги ҳақида қизиқарли парчалардан бирини қуйида ўқишингиз мумкин.
Мактабга 3 ёшида борган
Илон уч ёшлигида онаси қизиқиши кучли эканини сезиб, уни тайёргарлик мактабига беришга қарор қилади. Мактаб директори уни бу фикридан қайтаришга ҳаракат қилиб, Илон синфда энг ёш бола бўлишини ва тенгдошлари билан мулоқот қилишда қийналишини айтади. Яна бир йил кутганингиз маъқул, дейди у. “Мен кутолмайман, деди онаси Мэй. — У фақат мен билан эмас, бошқалар билан ҳам мулоқот қилиши керак. Бу бола ҳақиқатан ҳам даҳо”. У ўз қарорида қатъий туради.
Дарсларда “узилиб қолиш” одати
Илоннинг ота-онасини мактаб директори чақириб, “Бизда Илоннинг ривожланиши суст эканига асос бор”, дейди. Ўқитувчилардан бири унинг ҳар доим хаёл суриб юришини ва ҳеч кимни эшитмаслигини айтади. “У доимо деразага қараб туради, мен ўзимга қаратишга уринсам, барглар аллақачон жигарранг тус олган, деб жавоб беради,” дейди ўқитувчи.
Илоннинг чуқур ўйга чўмиб, атроф-муҳитдан узилиб қолиш одати болалигидан бошланган. “Болалигимдан бери бирор нарса ҳақида жиддий ўйлай бошласам, барча сезги аъзоларим ўчиб қолгандек бўлади, дейди у. Ҳеч нарсани кўрмайман ва эшитмайман. Мен ўша пайтда миямни ҳисоб-китоб қилиш учун ишлатаман, кирувчи маълумотни қайта ишлаш учун эмас”. Бошқа болалар унинг диққатини жалб қилиш учун олдида сакрашиб, қўл силкитишарди, лекин Илон уларни умуман сезмасди.
Ёлғизлик ҳисси
“У мактабга борганида ўзини жуда ғамгин ва ёлғиз ҳис қила бошлади, дейди онаси. Укаси ва синглиси — Кимбалл ва Тоска биринчи куннинг ўзидаёқ дўст орттириб, уларни уйга олиб келишарди. Лекин Илон ҳеч қачон кимнидир уйга таклиф қилмасди. У дўстлашишни хоҳларди, лекин қандай қилишни билмасди”.
Натижада у ёлғизланиб қолади. “Болалигимда доимо мен ёлғиз қолишни хоҳламайман, деб такрорлардим”, дейди у 2017 йилда Rolling Stone журналига берган интервьюсида.
Янги нарсаларни тез ўрганади, лекин кўп хаёл суради
“Математика дарсида у янги нарсаларни тез ўзлаштирарди”, деб таъкидлаган эди унинг ўқитувчиси. Бироқ унинг табелидаги изоҳлар доимо бир хил мавзуда бўлган: “У жуда секин ишлайди, чунки хаёл суради ёки қилмаслиги керак бўлган ишларни қилади”; “У камдан кам ҳолларда бошлаб қўйган ишини тугатади. Келаси йилда у ўз ишига эътибор бериши ва дарсда хаёл сурмаслиги керак”; “Унинг иншо ва ижодий ишларида фаол тасаввури борлигини кўрсатади, лекин ҳар доим берилган вақт ичида тугатолмайди”. Ўрта мактабга ўтишидан олдин унинг ўртача баҳоси 100 дан 83 эди.
Тунги китобхон
Илон ҳақиқий саргузаштларга ошно бўлиб, тун бўйи китоб ўқийди. Эрталаб соат 6 да онасининг хонасида чироқ ёнганда, у ухлаб қоларди. Шу сабабли онасига уни мактабга уйғотиш қийин бўларди, баъзан мактабга соат 10 га яқин борарди.
Баъзида у 9 соат давомида танаффуссиз китоб ўқирди. Оиласи билан кимнингдир уйига меҳмонга боришганида Илон уй эгасининг кутубхонасида йўқолиб қоларди. Шаҳар марказига боришса, бошқалардан ажралиб, доимо китоб дўконида бўларди. Дўконда ерга ўтириб олганча ўз дунёсига чўмиб кетарди.
Бошқа сайёраларга саёҳат қилишни орзу қиларди
Отасининг кабинетида топилган китоблардан бирида келажакда пайдо бўладиган буюк ихтиролар ҳақида сўз борарди. “Мактабдан қайтганимда отамнинг кабинетига туташ хонага кириб, уни қайта-қайта ўқирдим”, дейди Маск. Ушбу китобда ион двигатели билан ишлайдиган ракета тасвирланганди, бу двигатель заррачалар орқали ишлаб, ёнилғи сарфламасди.
Бир куни кечқурун Техасдаги ракета базасида ўтирганимда Маск менга бу китоб ҳақида батафсил гапириб берди ва ион двигатели қандай қилиб вакуумда ишлашини тушунтирди. “Ушбу китоб менда бошқа сайёраларга саёҳат қилиш ғояси туғилишига сабаб бўлган”, дейди у.
Изоҳ (0)