Ўзбекистонда инфляция кутилган (5 фоиз) даражага тушиши кечикишда давом этмоқда. Ўтган тўрт йил давомида Марказий банк инфяция бўйича таргетни тўрт марта ўзгартирди.
Марказий банк 2020 йил январдан инфляцион таргетлаш режимига ўта бошлаган. Мазкур тизим инфляция даражасини пасайтириш орқали аҳоли турмуш даражасини яхшилаш ва барқарор иқтисодий ўсиш учун шароитлар яратишни назарда тутади.
2019 йилдаги президент фармонида Марказий банкка инфляцияни 2021 йилда 10 фоизга пасайтириш, 2023 йилда эса 5 фоиз даражадаги доимий инфляцион мақсадни (таргет) ўрнатиш топширилган. Бироқ бу мақсадга ҳали етилгани йўқ.
Сўнгги тўрт йиллик якунларида Ўзбекистонда кузатилган йиллик инфляция кўрсаткичлари қуйидагича:
- 2020 йилда — 13,5 фоиз;
- 2021 йилда — 10 фоиз;
- 2022 йилда — 12,3 фоиз;
- 2023 йилда — 8,8 фоиз.
Жорий йилнинг сентябрь ойида мамлакатда йиллик инфляция кўрсаткичи 10,5 фоизни ташкил этди. Бугунгача инфляция таргетлари тўрт марта ўзгартирилди. Хусусан, 2020 йилда 5 фоизлик таргет кўрсаткичига эришиш муддати 2023 йилга, 2022 йилдаги мақсад 2024 йил охирига, ўтган йили эса бу муддат 2025 йил иккинчи ярмига кўчирилган.
Яқинда Марказий банк раис ўринбсари Беҳзод Ҳамраев 5 фоизлик инфляция даражасига 2026 йилнинг иккинчи ярмида етиш прогноз қилинаётганини айтди. Мутахассис журналистлар билан суҳбатда инфляцияни таргет даражасида пасайишига тўсиқ бўлувчи баъзи хатарлар мавжудлигини ҳам эслатиб ўтди. Жумладан, таклиф томонидан узилишлар бўлиши, бюджет дефицити ортиши, имтиёзли кредитлар ажратишнинг камайиши ва бошқа хатарлар кўзланган мақсадга етишни кечиктириши мумкин.
Иқтисодиёт ва молия вазирлиги эълон қилган 2025–2027 йил бюджет мўлжалларига оид пронозларда жорий йил якунида инфляция даражаси 9 фоиз шаклланиши келтирилган. Шу билан бирга, 2025 йил якунида бу кўрсаткич 7 фоизга туширилиши кўрсатилган. 2026 йилда эса мамлакатда инфляция даражаси 5–6 фоизга, 2027 йилда мақсад қилинган рақам — 5 фоизга пасайтирилиши прогноз қилинган.
Изоҳ (0)