O‘zbekistonda inflyatsiya kutilgan (5 foiz) darajaga tushishi kechikishda davom etmoqda. O‘tgan to‘rt yil davomida Markaziy bank infyatsiya bo‘yicha targetni to‘rt marta o‘zgartirdi.
Markaziy bank 2020-yil yanvardan inflyatsion targetlash rejimiga o‘ta boshlagan. Mazkur tizim inflyatsiya darajasini pasaytirish orqali aholi turmush darajasini yaxshilash va barqaror iqtisodiy o‘sish uchun sharoitlar yaratishni nazarda tutadi.
2019-yildagi prezident farmonida Markaziy bankka inflyatsiyani 2021-yilda 10 foizga pasaytirish, 2023-yilda esa 5 foiz darajadagi doimiy inflyatsion maqsadni (target) o‘rnatish topshirilgan. Biroq bu maqsadga hali yetilgani yo‘q.
So‘nggi to‘rt yillik yakunlarida O‘zbekistonda kuzatilgan yillik inflyatsiya ko‘rsatkichlari quyidagicha:
- 2020-yilda — 13,5 foiz;
- 2021-yilda — 10 foiz;
- 2022-yilda — 12,3 foiz;
- 2023-yilda — 8,8 foiz.
Joriy yilning sentyabr oyida mamlakatda yillik inflyatsiya ko‘rsatkichi 10,5 foizni tashkil etdi. Bugungacha inflyatsiya targetlari to‘rt marta o‘zgartirildi. Xususan, 2020-yilda 5 foizlik target ko‘rsatkichiga erishish muddati 2023-yilga, 2022-yildagi maqsad 2024-yil oxiriga, o‘tgan yili esa bu muddat 2025-yil ikkinchi yarmiga ko‘chirilgan.
Yaqinda Markaziy bank rais o‘rinbsari Behzod Hamrayev 5 foizlik inflyatsiya darajasiga 2026-yilning ikkinchi yarmida yetish prognoz qilinayotganini aytdi. Mutaxassis jurnalistlar bilan suhbatda inflyatsiyani target darajasida pasayishiga to‘siq bo‘luvchi baʼzi xatarlar mavjudligini ham eslatib o‘tdi. Jumladan, taklif tomonidan uzilishlar bo‘lishi, byudjet defitsiti ortishi, imtiyozli kreditlar ajratishning kamayishi va boshqa xatarlar ko‘zlangan maqsadga yetishni kechiktirishi mumkin.
Iqtisodiyot va moliya vazirligi eʼlon qilgan 2025–2027-yil byudjet mo‘ljallariga oid pronozlarda joriy yil yakunida inflyatsiya darajasi 9 foiz shakllanishi keltirilgan. Shu bilan birga, 2025-yil yakunida bu ko‘rsatkich 7 foizga tushirilishi ko‘rsatilgan. 2026-yilda esa mamlakatda inflyatsiya darajasi 5–6 foizga, 2027-yilda maqsad qilingan raqam — 5 foizga pasaytirilishi prognoz qilingan.
Izoh (0)