Июль ойида аксар озиқ-овқат маҳсулотлари арзонлашди, ноозиқ-овқат маҳсулотлари ҳамда хизматлар нархи ўсишда давом этди. Бу ҳақда Статистика агентлиги маълумот берди.
Ўзбекистонда жорий йил июль ойида дефляция кузатилиб, нархлар 0,3 фоизга пасайди. Йиллик инфляция 10,5 фоизни ташкил этди.
Ўтган ойда озиқ-овқат маҳсулотлари июндагига қараганда 1,5 фоиз арзонлашди. Ноозиқ-овқат маҳсулотлари 0,7 фоиз, хизматлар 0,5 фоиз қимматлашди.
Асосий озиқ-овқат маҳсулотларидан гўшт 1,5 фоиз, гуруч 0,5 фоиз, кунгабоқар ёғи 1 фоизга қимматлашган. Буғдой уни 0,3 фоиз, сут 0,5 фоиз, тухум 2,5 фоиз, шакар 0,3 фоиз арзонлашган.
Июль ойида қатор мева-сабзавотлар нархларида кескин пасайиш кузатилди. Хусусан, тарвуз 43 фоизга, помидор 40,7 фоиз, бақлажон 35,8 фоиз, қовун 31,3 фоиз, бодринг 11,9 фоиз, олма 5,6 фоиз, картошка 2,6 фоизга арзонлашган.
Ўтган ой давомида бензин 0,7 фоизга арзонлашган, метан нархи ўзгармаган, пропан эса 3,8 фоиз қимматлашгани қайд этилган.
Июлда транспорт нархлари ҳам июндагига нисбатан ўсишда давом этган. Жумладан, шаҳар атрофида қатнайдиган поездлар йўл ҳақи ой давомида 3,4 фоизга, узоқ масофага қатнайдиган поездлар чиптаси 2,5 фоизга қимматлашган. Республика ичида авиақатновлар чиптаси 0,6 фоизга, халқаро йўналишдаги авиақатновда чипталар 0,9 фоизга ошган.
Электр ва газ нархлари 0,2 фоизга кўтарилган. Иссиқ сув таъминоти учун тўлов нархи 2,6 фоиз, марказий иситиш тизими учун тўлов 3,2 фоиз қимматлашган.
Июль ойида дори воситаларининг нархлари ҳам ошишда давом этиб, июндагидан 2,2 фоизга қимматлашган. Кийим-кечаклар нархлари 0,6 фоиз кўтарилган бўлса, турар–жойлар учун ижара нархлари ўзгармаган.
Изоҳ (0)