Марказий Осиё ўзининг геосиёсий жойлашуви туфайли глобал ишонч инқирози ва можаролар кескинлашувининг барча салбий оқибатларини тўлиқ бошдан кечирмоқда. Бу ҳақда Шавкат Мирзиёев Марказий Осиё давлатлари раҳбарлари Маслаҳат учрашувида айтиб ўтди.
Президентнинг қайд этишича, Украина атрофида ва Яқин Шарқда содир бўлаётган воқеалар минтақанинг барқарор ривожланишига тўғридан тўғри таъсир кўрсатмоқда. Анъанавий савдо ва транспорт занжирлари бузилди.
“Биз санкциялар сиёсатининг асирига айландик, логистика харажатлари сезиларли даражада ошди, инфляция босими кучаймоқда. Жаҳон капитал бозорида имкониятлар қисқармоқда, протексионизм кучайиб, янги-янги тўсиқлар пайдо бўлмоқда”, — деди Шавкат Мирзиёев.
Давлат раҳбарининг таъкидлашича, минтақа барқарорлигининг муҳим омили ҳисобланган қўшни Афғонистондаги вазиятнинг ривожланиши билан боғлиқ масалалар халқаро кун тартибида иккинчи даражага тушиб қолди.
“Шуни таъкидлаб ўтмоқчиманки, Марказий Осиёнинг бугуни ва келажаги, мамлакатларимиз ва халқларимиз фаровонлиги кўп жиҳатдан умумий саъй-ҳаракатларимизга, яқиндан ҳамкорлик қилиш, қатъий чоралар кўриш ва минтақа манфаатларини биргаликда илгари суришга тайёрлигимизга боғлиқ”, — деди президент.
Шу муносабат билан Ўзбекистон раҳбари ташқи сиёсат идоралари томонидан стратегик ҳужжат — Минтақавий хавфсизлик ва барқарорликни таъминлаш концепциясини ишлаб чиқишни таклиф этди.
Изоҳ (0)