Исроил Мудофаа вазирлиги Iron Beam лазерли ҳаво мудофаа тизимларини етказиб бериш бўйича 500 миллион долларлик шартномаларни имзолади.
Бу ҳақда Исроил Мудофаа вазирлиги бош директори Эял Замирга таяниб, The Times of Israel нашри хабар берди.
“Ушбу келишув янги давр — лазерли мудофаа тизими даври бошланганини англатади”, деди Замир.
Унинг сўзларига кўра, 2025 йил давомида ҳаво ҳужумига қарши мудофаа тизимидаги биринчи ер устидаги лазерли қурилмалар ишга туширилади.
Ушбу қуролларни етказиб бериш бўйича келишувларга Мудофаа вазирлиги ва Исроил мудофаа кучларининг қўшма органи бўлган Қурол ва технологик инфратузилмани тадқиқ қилиш, ривожлантириш бошқармаси ҳамда Рафаэл Advanced Defence Systems, шунингдек, Elbit Systems мудофаа компаниялари эришган эди.
Iron Beam турли хил ҳаво нишонлари, жумладан, ракеталар ва миномётлар, дронлар ва қанотли ракеталар билан курашиш учун мўлжалланган. Бу қурилмалар Исроилнинг кўп қатламли мудофаа тизимининг бир қисмига айланиши ва “Темир гумбаз” ракетага қарши мудофаа тизимини тўлдириши керак.
Рафаэл Advanced Defence Systems бош директори Йоав Тургеман бу ишланмалар бир неча йил давом этганини ва ҳозирда фойдаланишга тайёр бўлган бундай лазер тизимлари бутун дунё бўйлаб биринчи бўлиб ишлаётганини таъкидлаган.
Изоҳ (0)