Исроил армиясининг 26 октябрга ўтар кечаси уюштирган ҳужуми Эроннинг баллистик ракета ишлаб чиқариш дастурининг асосий таркибий қисмини ишдан чиқарди. Бу ҳақда Исроил манбаларига таяниб, Axios портали хабар берди.
Йўқ қилинган ускуналар Эроннинг ракета арсеналини тезда тўлдиришни чеклаб қўйган. Шунинг учун Теҳрон Исроилга ракета ҳужумларини амалга оширмаслиги мумкин, дейди суҳбатдошлар.
Исроил зарбалари узоқ масофали ракеталар учун қаттиқ ёнилғи ишлаб чиқаришда фойдаланиладиган 12 та “планетар аралаштиргич”ни (смесител) ишдан чиқарди, дейилади хабарда.
Ҳужумга учраган объектлар Эроннинг ўзи мустақил равишда ишлаб чиқара олмайдиган “ғоят мураккаб ускуналар” ҳисобланади. Манбаларнинг таъкидлашича, Эрон томонидан бундай ускуналар Хитойдан харид қилинади. Объектларни тиклаш тахминан бир йил вақт олиши мумкин.
Эрон ҳали ҳам катта ракета захираларига эга бўлса-да, ишлаб чиқаришнинг мажбурий қисқариши “Ҳизбуллоҳ” ва Яман ҳусийларининг захираларини тўлдиришга имкон бермайди.
Ҳужум пайтида Эроннинг ядро объектларини ҳимоя қилган тўртта С-300 ҳаво мудофааси батареяси йўқ қилингани айтилмоқда.
Исроилнинг Эронга ҳужуми
26 октябрь кечаси яҳудий давлати армияси Эрондаги ҳарбий объектларга ҳаво ҳужуми уюштирди. Ракета ишлаб чиқариш заводлари ва ҳаво ҳужумидан мудофаа тизимлари нишонга олинди. Эрон томони ҳужум қайтарилгани, бироқ “чекланган зарар” етказилганини билдирди. Икки ҳарбий хизматчи ҳалок бўлди. Ҳужум муносабати билан Эрон Бирлашган Миллатлар ташкилоти Хавфсизлик кенгашининг фавқулодда йиғилишини ўтказишга чақирди.
Изоҳ (0)