Эрон ҳаво ҳужумидан мудофаа тизими Исфаҳон осмонида бир нечта дронларни уриб туширди. Бу ҳақда Эрон оммавий ахборот воситалари хабар берди.
Маълум қилинишича, авиатехникалар Исроил томонидан учирилган. Эрон ҳудудига ҳужум содир этилгани ҳақида ҳозирча расмий хабарлар йўқ. Дастлаб Американинг ABC News телеканали Исроил Эронга ракета ҳужуми уюштиргани ҳақида хабар берган. ОАВ маълумотларига кўра, портлашлар Исфаҳон аэропорти ҳудудида содир бўлган ва у ерда Эрон ҳаво кучларининг 8-ҳаво мудофаа тизимлари фаоллашган.
Исфаҳонда учта портлаш овози эшитилган, эҳтимол, кичик дронларнинг пайдо бўлиши сабабли ҳаво ҳужумидан мудофаа тизими ишлаган.
Таъкидланишича, шаҳардаги ядро иншоотлари бутунлай хавфсиз ҳолатда. IRNA давлат агентлиги ҳаво ҳужумидан мудофаа тизими Эроннинг бошқа вилоятларида ҳам ҳужумни қайтарганини ёзмоқда. Хусусан, портлаш овози Табриз ғарбида ва Води-и Раҳмат ҳудудида эшитилган. Мамлакат расмийлари Теҳрон, Исфаҳон ва Шероз устидан парвозларни бекор қилган.
Bloomberg америкалик расмийларга таяниб, Исроил 18 апрель куни АҚШни яқин 24-48 соат ичида Эронга жавоб зарбаси беришидан огоҳлантирганини ёзмоқда. Ҳозирда Исроилда ҳам ҳаво ҳужумидан мудофаа тизими ишга тушган.
Эрон ва Исроил ўртасидаги кескинлик
Исроил 1 апрель куни Дамашқдаги Эрон консуллигига авиазарбаси берди. Дипломатик кварталга уюштирган ҳужум оқибатида эронлик генераллар Муҳаммад Ризо Зоҳидий ва Муҳаммад Ҳоди ҳожа Раҳимий, шунингдек, Ислом инқилоби қўриқчилари корпусининг беш нафар зобити ҳалок бўлди.
Исроил ҳужумини Ўзбекистон ташқи ишлар вазирлиги ҳам қоралади. Эрон консуллигига уюштирилган ҳужумга жавобан 14 апрелга ўтар кечаси Исроил ҳудудига 300 дан ортиқ дрон, қанотли ва баллистик ва ракеталар учирди. Исроил армияси уларнинг 99 фоизи уриб туширилгани, бунга 3,5 миллион доллар сарфланганини даъво қилди.
Эрондан учирилган дрон ва ракеталарни уриб туширишга АҚШ ҳам ёрдам берди. Ҳужумдан кейин Жо Байден Исроил бош вазири Бинямин Нетаняху билан суҳбатда уни Эронга жавоб зарбаси беришдан тийилишга чақирди. Теҳрон Исроилдан ҳужум бўлган тақдирда кучли қуролларини ишга солишидан огоҳлантирди.
Исроил армияси Эронга, албатта, керакли вақт ва пайтда жавоб қайтарилиши, бундан бошқа чора йўқлигини эълон қилди. АҚШ мудофаа вазири Ллойд Остин исроиллик ҳамкасби Ёав Галлант билан суҳбатда вазиятни кескинлаштирмасликка чақирди. 19 апрелда эса Исроил Эронга жавоб ҳужуми уюштиргани ҳақида хабарлар тарқалди. Ҳозирда бу борада расмий маълумот эълон қилинмаган.
Изоҳ (0)