Ливаннинг “Ҳизбуллоҳ” гуруҳи Байрутдаги шифохона остидаги бункерда 500 миллион доллар нақд пул ва олтин яширган. Бу ҳақда Исроил мудофаа кучлари вакили Даниэль Ҳагарига таяниб, The Times of Israel хабар берди.
У Ливан ҳукумати ва халқаро ташкилотларни “Ҳизбуллоҳ”нинг бу бойликлардан Исроилга қарши ҳужумлар учун фойдаланишига йўл қўймасликка чақирди. Ҳагарининг сўзларига кўра, гап Байрут жанубидаги Ал-Саҳел клиникаси ҳақида кетмоқда. У Исроил армияси шифохонага ҳужум қилиш ниятида эмаслигини айтган.
Шуни таъкидламоқчиман: биз Ливан халқи билан уруш ҳолатида эмасмиз, деган Ҳагари.
Ливан телевиденияси эҳтиёт чораси сифатида ходимлар ва беморлар шифохонадан кўчирилгани ҳақида хабар берган.
Ўз навбатида, клиника бошқарувчиси Фади Аламеҳ Исроилни туҳматда айблаган. У Ливан армиясини касалхона ҳудудига кириб, у ерда фақат беморлар, операция хоналари ва морггина жойлашганини тасдиқлашга чақирган.
Изоҳ (0)