Исроил авиацияси 9 июль куни “Ҳизбуллоҳ”нинг ҳаво-мудофаа иншоотларига зарба берган. Бу ҳақда Яқин Шарқ нашрлари хабарларига асосланиб, Al Jazeera маълум қилди.
Ҳужум Ливаннинг Жанта шаҳарчаси ҳудудида содир этилган. Шаҳарча теварагидаги ҳарбий иншоотларга серияли ҳужумлар ташкил этилган.
Исроил ҳарбий раҳбарияти ҳужум содир этилганини тасдиқлаган. Ҳаво зарбалари Ливан пойтахтидан 79 километр узоқликдаги нуқталарга йўналтирилган.
Ҳужумни Ливан раҳбарияти жиддий сигнал сифатида қабул қилган. Чунки Исроил мамлакатнинг бу қадар ички қисмига зарба бермаган.
Исроил ҳарбий-ҳаво кучлари параллел равишда яна иккита “Ҳизбуллоҳ” базасига бомбалар ташлаган. Ливан жанубидаги Барахит шаҳридаги ҳаво базаси ва Кфар Кила ҳудудидаги қурол омборига кетма-кет зарбалар берилган.
Ливан жанубидаги Маржаюн шаҳридан хабар берган Al-Jazeera мухбири яна бешта ҳудудда Исроил ҳужуми кузатилганини ёзган. Унга кўра, яҳудий армияси артиллерияси, дрон ва ракеталари Бека водийсидаги Ярун, Ҳаддафа, Ҳула, Тулин ва ал-Наби Шайф ҳудудларига талафотлар етказган.
Ливан томони ҳужумда ҳалок бўлганлар ва жароҳатланганлар ҳақида маълумот эълон қилмаган. Ҳарбий иншоотларга етказилган зарар кўлами ҳам ошкор этилмаган.
Изоҳ (0)