Эрон ҳукумати вакили 19 апрель куни Эронга ўтган тунда ракета ҳужуми содир этилмаганини, Исфаҳон шаҳри яқинида эшитилган портлашлар Эрон ҳаво ҳужумидан мудофаа тизимларининг фаоллашиши натижасида содир бўлганини айтди, дея хабар берди Reuters.
Олдинроқ Эрон давлат телевидениеси Исфаҳон осмонида учта дрон аниқлангани ҳақида хабар берган эди. Ҳаво мудофааси фаоллаштирилган ва дронларни йўқ қилган. Бир оз вақт ўтгач, тунги ҳужум натижасида ҳеч ким жабрланмагани ҳақида айтилган. ОАВнинг сўнгги маълумотларига кўра, Исфаҳон шаҳрида тунда эшитилган шовқин ҳаво ҳужуми мудофаасининг шубҳали объектга қаратилган операциялари туфайли юзага келган.
Кеча тунда Исроил Эрондаги объектга ракета ҳужуми уюштиргани ҳақида хабар берилган эди. Эрон давлат матбуотига кўра, портлашлар Исфаҳон аэропорти яқинида содир бўлган, уларнинг сабаблари очиқланмаган.
Эрон Космик агентлиги матбуот котиби Ҳусайн Далириан “бир нечта” дронлар “муваффақиятли уриб туширилганини” айтган.
Айни пайтда ракета ҳужуми ҳақида хабарлар йўқ, — деб ёзган у Х ижтимоий тармоғида.
17 апрель куни Исроил ОАВ Эрон ҳужумига жавоб қайтаришга қарор қилгани, аммо жавоб зарбаси учун ҳали муддат белгиланмагани ҳақида хабар берган эди.
Изоҳ (0)