Айни пайтда мамлакатда пенсионерлар сони 4,1 миллион нафар бўлиб, уларнинг 4 фоиздан ортиғи яқини жорий йилда пенсияга чиққан.
Жорий йил январь сентябрь ойларида Пенсия жамғармаси томонидан 225 333 нафар фуқароларга янги пенсиялар тайинланди. Жамғарма хабарига кўра, шундан 179 183 киши ёшга доир пенсия ола бошлаган. Қолган 32 428 нафарига ногиронлик пенсияси, 13 722 та оилага боқувчисини йўқотганлик пенсияси тайинланган.
Сўнги маълумотларга кўра, Пенсия жамғармаси ҳисобида турган пенсионерлар сони 4,1 миллион нафардан ортган. Уларнинг 3,2 миллион нафари (79 фоиз) ўз пенсияларини нақд пулсиз шаклда олади.
Аввалроқ Пенсия жамғармаси бўлим бошлиғи Даврон Позилов “Дарё”га берган интервьюсида 2024 йилда пенсияларга жами 63 триллион сўм ажратилишини айтганди.
“Жорий йил январь–август ойларида жами пенсия тўловларига 40,2 триллион сўм йўналтирилди. Сентябрдан пенсиялар миқдори 15 фоизга оширилиши ҳисобига яна қўшимча 2,9 триллион сўм ажратилади. Мазкур маблағ қолган 23 триллион сўмга қўшилиб, йил охиригача тўлаб борилади”, деган жамғарма вакили.
Маълумот учун, 2024 йил 1 сентябрдан пенсия ва нафақалар миқдори 15 фоизга оширилди. Хусусан, пенсияни ҳисоблашнинг базавий миқдори ойига 428 минг сўм, ёшга доир энг кам пенсия миқдори ойига 834 минг сўм этиб белгиланди. Ҳозирда 2 миллион 200 минг нафар фуқаро ёшга доир энг кам пенсия миқдоридан юқори миқдорда пенсия олади.
Изоҳ (0)