Пенсия ва нафақалар ошди. Янги тўловлар миқдори қандай бўлади?

Президент фармони билан 2024 йил 1 сентябрдан бошлаб Ўзбекистонда пенсия ва нафақалар миқдори 15 фоизга оширилмоқда. “Дарё” Пенсия жамғармаси ҳамда Ижтимоий ҳимоя миллий агентлиги билан боғланиб, пенсия ва нафақаларнинг янги миқдорлари тўғрисида маълумот олди.

Пенсияларнинг янги миқдорлари

Сентябрь ойидан мамлакатда пенсияни ҳисоблашнинг базавий миқдори амалдаги 372 000 сўмдан 428 000 сўмга оширилмоқда.

Ёшга доир энг кам пенсия миқдори ойига амалдаги 725 000 сўмдан 834 000 сўмга кўтарилди.

Ногиронлик пенсиялари, жумладан иш стажи тўлиқ бўлмаган чоғдаги ногиронлик пенсиясининг энг кам миқдори — ойига 800 000 сўмдан 920 000 сўмга етказилди. 

Боқувчисини йўқотганлик пенсияси олувчиларнинг бир нафар меҳнатга қобилиятсиз оила аъзоси учун пенсиянинг энг кам миқдори — ойига 648 000 минг сўмдан 745 000 сўмга етказилди. Кейинги ҳар бир меҳнатга қобилиятсиз оила аъзоси учун амалдаги тартибга мувофиқ пенсия тўланади.

Келаси ойдан белгиланган ёшга доир энг кам пенсия миқдоридан (834 000 сўмдан) 920 000 сўмгача пенсия олувчиларнинг ёшга доир пенсиялари миқдори — ойига 800 000 сўмдан 920 000 сўмга оширилди.

Иш стажи тўлиқ бўлмаган чоғдаги ёшга доир пенсиянинг энг кам миқдори қўшимча тўловни ҳисобга олган ҳолда — ойига 648 000 сўмдан 745 000 сўмга етказилди.

Шунингдек, 1941–1945 йиллардаги уруш оқибатида ногирон бўлган шахслар ва унинг қатнашчилари, шунингдек, фашистлар конслагерларининг вояга етмаган собиқ маҳбуслари ва Ленинград шаҳри қамал қилинган даврда ишлаган шахсларнинг энг кам пенсия миқдори устамаларни инобатга олган ҳолда — ойига 3 527 000 сўмдан 4 056 000 сўмга оширилди.

Нафақалар янги миқдорлари

Ижтимоий ҳимоя миллий агентлигининг маълум қилишича, 1 сентябрдан ёшга доир нафақалар амалдаги 648 000 сўмдан 745 000 сўмга оширилади.

Келаси ойдан I гуруҳ ногиронлик нафақаси ойига 1 027 000 сўм (амалда 893 000 сўм), II гуруҳ ногиронлик нафақаси 920 000 сўмга (амалда 800 000 сўм) етади.

Ўз навбатида мамлакатда боқувчисини йўқотганлик нафақаси миқдори ҳозирги 648 000 сўмдан 745 000 сўмга оширилади.

Ногиронлиги бўлган 18 ёшгача болалар нафақаси эса 800 000 сўмдан 920 000 сўмга кўтарилади.

Шу билан бирга, сентябрдан парваришлаш нафақаси — 745 000 сўм (амалда 648 000 сўм), бола туғилганда бериладиган бир марталик нафақа (“суюнчи пули”) 811 965 сўмдан (амалда 738 000 сўм) тўлана бошлайди.

Дафн маросими нафақаси эса амалдаги 1 488 000 сўмдан 1712 000 сўмга оширилади.

Қўшимча қилинишича, келаси ойдан боқувчисини йўқотганлик нафақаси олувчиларнинг бир нафар меҳнатга қобилиятсиз оила аъзоси учун нафақа миқдори ойига 745 000 сўмни ташкил этади. Кейинги ҳар бир меҳнатга қобилиятсиз оила аъзоси учун 244 000 сўмдан қўшилади.