Мамлакатимизнинг кўплаб фуқаролари чет давлатларда меҳнат қилиб, оилаларини моддий таъминлаш йўли билан миллий иқтисодиётга ўз ҳиссаларини қўшишмоқда. Уларни қўллаб-қувватлаш ва ҳимоя қилиш давлатнинг асосий вазифаларидан бири бўлиб қолмоқда.
Ўзбекистон Либерал-демократик партияси томонидан меҳнат мигрантларининг ҳимояси ва ижтимоий суғурта тизимини такомиллаштириш ташаббусининг илгари сурилиши партия фаолиятининг кенг қамровли эканлигини, жамиятимиз учун долзарб масалалар унинг диққат марказидан четда қолмаслигини кўрсатади.
Ҳозирги кунда меҳнат мигрантларига қатор имтиёзлар берилмоқда. Шу билан бирга, меҳнат мигрантларини қўллаб-қувватлаш амалиётида айрим камчиликлар ҳам мавжуд. Меҳнат мигрантлари ва уларнинг оила аъзолари кўпинча ижтимоий ҳимоя билан тўлиқ қамраб олинмаяпти.
Меҳнат мигрантлари ва уларнинг оила аъзоларига нисбатан ижтимоий суғурта тизимини такомиллаштириш, яъни суғурта дастурларини кенгайтириш, уларга тиббий ёрдам, пенсия ва ишсизлик кўмаги кўрсатиш, суғуртага кирадиган хизматлар рўйхатини кенгайтириш мақсадга мувофиқ.
Партиямизнинг Сайловолди дастурида халқаро тажрибалардан фойдаланиш орқали Ўзбекистонда меҳнат мигрантлари ва уларнинг оила аъзолари учун самарали ижтимоий суғурта ва ҳимоя тизимини жорий қилиш вазифаси белгиланган.
Бунда ижтимоий суғурта хизматларини мигрантлар учун кенг жорий этиш, шу жумладан, соғлиқни сақлаш, пенсия, вақтинчалик меҳнатга лаёқатсизлик ва бошқа ижтимоий суғурта турларини самарали қўллашга эътибор қаратилган. Меҳнат мигрантлари оила аъзолари учун имтиёзли кредитлар ажратиш, таълим ва соғлиқни сақлаш имкониятларини кенгайтириш ушбу вазифани ҳал қилишда муҳим ўрин тутади.
Хорижий тажрибага назар ташлайдиган бўлсак, Ҳиндистон, Мексика, Филиппин сингари мамлакатларда меҳнат мигрантларига нисбатан ҳимоя ва ёрдам тизими, махсус қонунчилик, суғурта дастурлари мавжудлигини кўришимиз мумкин.
Партиямиз томонидан бу йўналишда илгари сурилган таклиф ва ташаббуслар меҳнат мигрантлари ва уларнинг оила аъзоларига ижтимоий суғурта ва ҳимоя тизимини кенгайтириш орқали уларнинг ҳуқуқлари ҳимоясини кучайтириш, тегишли манзилли молиявий ёрдам ҳамда таълим дастурлари орқали уларнинг иқтисодий ҳолатини яхшилашга кенг имкон беради.
Изоҳ (0)