Ayni paytda mamlakatda pensionerlar soni 4,1 million nafar bo‘lib, ularning 4 foizdan ortig‘i yaqini joriy yilda pensiyaga chiqqan.
Joriy yil yanvar-sentyabr oylarida Pensiya jamg‘armasi tomonidan 225 333 nafar fuqarolarga yangi pensiyalar tayinlandi. Jamg‘arma xabariga ko‘ra, shundan 179 183 kishi yoshga doir pensiya ola boshlagan. Qolgan 32 428 nafariga nogironlik pensiyasi, 13 722 ta oilaga boquvchisini yo‘qotganlik pensiyasi tayinlangan.
So‘ngi maʼlumotlarga ko‘ra, Pensiya jamg‘armasi hisobida turgan pensionerlar soni 4,1 million nafardan ortgan. Ularning 3,2 million nafari (79 foiz) o‘z pensiyalarini naqd pulsiz shaklda oladi.
Avvalroq Pensiya jamg‘armasi bo‘lim boshlig‘i Davron Pozilov “Daryo”ga bergan intervyusida 2024-yilda pensiyalarga jami 63 trillion so‘m ajratilishini aytgandi.
“Joriy yil yanvar–avgust oylarida jami pensiya to‘lovlariga 40,2 trillion so‘m yo‘naltirildi. Sentyabrdan pensiyalar miqdori 15 foizga oshirilishi hisobiga yana qo‘shimcha 2,9 trillion so‘m ajratiladi. Mazkur mablag‘ qolgan 23 trillion so‘mga qo‘shilib, yil oxirigacha to‘lab boriladi”, degan jamg‘arma vakili.
Maʼlumot uchun, 2024-yil 1-sentyabrdan pensiya va nafaqalar miqdori 15 foizga oshirildi. Xususan, pensiyani hisoblashning bazaviy miqdori oyiga 428 ming so‘m, yoshga doir eng kam pensiya miqdori oyiga 834 ming so‘m etib belgilandi. Hozirda 2 million 200 ming nafar fuqaro yoshga doir eng kam pensiya miqdoridan yuqori miqdorda pensiya oladi.
Izoh (0)