Қашқадарё вилоятининг Қарши туманидаги Чароғил қишлоғида Нилуфар Юсупова исмли аёл маҳалладаги Суннат исмли ҳоким ёрдамчиси билан тил бириктириб, бир нечта фуқароларни алдаб, уларнинг номига кредит олиб, катта миқдордаги маблағни “еб кетгани” айтилмоқда.
Жабрланувчилар бу ҳақда “Дарё”га шикоят қилиб, қандай алданганликлари хусусида сўзлаб берди.
![](/static/2024/08/18/photo_2024-08-18_23-11-39-4VUyZM8l.jpg)
Нилуфар Юсупова менга уйингиз ҳужжатларини тўғирлаб бераман деб, ҳужжатларимни олди. Бир оз муддатдан кейин қилган иши учун 6 миллион сўм миқдорда пул сўради. Лекин шароитим яхши бўлмагани учун беролмадим. Ўша пайтлар отамнинг соғлиғида муаммоси борлиги туфайли вафот этди. Шу боис уй ҳужжатларимни ҳам маълум муддат текширолмадим. Бир-икки ойдан кейин эса уйим бошқа бир инсонга сотилганини билдим, менинг уй сотилишида мутлақо хабарим йўқ, дейди мурожаатчи аёллардан бири Шаҳноза Алиева.
Яна бир фуқаро Зоя Алимованинг айтишича, Нилуфар исмли аёл ҳоким ёрдамчиси билан бир бўлиб, унинг номига кредит олиб “еб кетган”.
Оилавий шароитим оғир бўлгани учун кредит олмоқчи эдим. Ҳоким ёрдамчиси Суннат ва Нилуфар Юсупова ёрдам беришларини айтиб, кредит олиб беришмоқчи бўлишди. Дастлаб ҳали иш битмаяпти деб юришди. Кейинчалик билсам, номимга кредит олиб, ўзлари еб кетишган экан. Улар менга кредит чиқариб беришлари эвазига 2 миллион сўм ҳам талаб қилишганди. Пластик карточкамни олиб, мана бир неча ойки, ҳали ҳам қайтаришгани йўқ. Ҳолат юзасидан тегишли жойларга мурожаат қилдим, лекин муаммо ҳали ҳам ўз ечимини топмади, дейди у.
Навбатдаги мурожаатчи Фотима Фармонованинг билдиришича, Нилуфар Юсупова ҳамда Суннат исмли ҳоким ёрдамчиси унга кам чиққан нафақа пулининг қолганини олиб келиб бериш баҳонасида фуқаролик паспортини олган. Кўп ўтмай унинг номига кредит олингани маълум бўлган.
![](/static/2024/08/18/photo_2024-08-18_23-11-38-8EkP6_fS.jpg)
Мен 500 минг сўм миқдорида нафақа пули олиб келардим. 2-3 ойдан кейин нафақа пулим 175 минг сўм кам чиқди. Бу муаммонинг сабабини билиш учун банкка бормоқчи эдим. Аммо Нилуфар Юсупова “пулни банкдан ўзим олиб келаман, хатолик бўлибди, қолгани нақд қилиб берилар экан”, деди. Иккинчи ойда 250 минг сўм кам пул тушди. Мен туман пенсия жамғармасига мурожаат қилганимда улар сизнинг номингизга кредит чиқарилган дейишди, дейди алданиб қолганини айтган аёл.
Жабрланувчининг билдиришича, номига кредит олинганлигидан мутлақо бехабар бўлган. У ҳеч қандай ҳужжатга қўл қўймаганини, ҳаттоки банкка ҳам бормаганини айтмоқда. Фуқаро номига кредит олинганини банк ходимлари кредит тўланиши масаласида безовта қила бошлагач, билган.
Навбатдаги фуқаро Дилафрўз Қобилова ҳам алданганини, ҳоким ёрдамчиси ва Нилуфар Юсупова исмли аёлнинг ҳийласига чув тушганини айтмоқда.
Алданган аёлнинг айтишича, Нилуфар Юсупова пулга муҳтожлигини айтиб, укасини Кореяга жўнатмоқчилигини, шу сабаб унинг номига кредит чиқаришда ёрдам сўраган. Жабрланувчи аёл дастлаб бунга рози бўлмаган. Нилуфар Юсупова аёлни ишонтириш учун уй ҳужжатларини олиб келиб берган.
Меннинг номимга 50 миллион сўм миқдорида, турмуш ўртоғим номига эса 33 миллион сўм миқдорда кредит олдик. 2024 йилнинг июнь июль ойидан бошлаб банк ходимлари мени безовта қила бошлашди. Кредитингизнинг тўлов муддати ўтиб кетган, агар тўламасангиз Damas русумли автомашинангизни мусодара қиламиз дейишди. Лекин мен ушбу автомобилни 107 миллион сўмга олганман. Бунинг кредитга ҳеч қандай алоқаси йўқ. Мен алданиб қолдим, дейди жабрланувчи.
Билдирилишича, айни кунда ҳоким ёрдамчиси ва аёлнинг хатти-ҳаракатлари юзасидан тергов жараёнлари кетмоқда.
Изоҳ (0)