Ўзбекистонда 68 нафар боланинг ўлими ва 16 нафар боланинг ногирон бўлиб қолишига сабабчи бўлган сироп ишлаб чиқарувчиси Ўзбекистон ДХХ томонидан қидирувга берилгани, Юнусобод туман суди уни қамоққа олиш ҳақида ажрим чиқаргани хабар берилганди. Ўзбекистонлик адвокатлар қидирувдаги тадбиркорни тутиш учун Ҳиндистон дориларининг Ўзбекистонга импорт қилинишига чек қўйишни таклиф қилмоқда. Бу ҳақда “Дарё” журналисти хабар берди.
Биз қидирувдаги ҳиндистонлик тадбиркорни ушлаш ва уни асосий айбдор сифатида жавобгарликка тортилиши учун судга Ўзбекистон томон Ҳиндистондан олиб келинаётган барча дорилар импортини чеклаши кераклигини айтдик. Шу ҳақда илтимоснома киритиб, суд масъул ташкилотларга бу ҳақида таклиф бериши кераклигини, шу йўл орқали қочиб юрган Сачинни қўлга олиш мумкинлигини тушунтиряпмиз. Биз бундан бошқа тўғри йўлни кўрмаяпмиз, — дейди адвокат Темур Раҳматов.
Ҳиндистонга бориб, Сачин Жаин ҳақида суриштирув олиб борган адвкотларнинг айтишича, Сачин Ҳиндистонда 27 та, унинг хотини Жая Жаин эса 26 та компанияга эгалик қилади.
Дастлабки инстанция солидар тартибда бир нечта судланувчилардан товон пули ундирилишини белгилаган. Лекин бу судланувчиларда бунча пул йўқ-ку. Бор бўлса, битта машинаси, уйи бордир. Лекин улар қанчага тортади? Аммо Сачин Жаинда миллион-миллионлик долларлик компаниялар бор. Лекин бунга ҳеч ким эътибор бермаяпти, — дейди адвокат.
Аниқлаштирилишича, Ҳиндистонда айни кунда корхона ва унинг 5 нафар масъули — компания директори Сачин Жайн, унинг хотини Жая Жайн, бошқарувчиси Тухин Бхаттачаря, кимёгар Атул Рават ва Мул Сингхларга қарши жиноят иши очилган.
Ҳиндистон қонунчилиги бўйича сироп ишлаб чиқарувчиларига қўйилаётган айбловлар тасдиқланса, айбдорларга олти ойлик қамоқ жазоси ёки 1000 рупий, ўзбек сўмида 150 минг сўм жарима жазоси тайинланиши мумкин. Боиси Ҳиндистон давлати сироп ишлаб чиқарувчиларни ноқонуний ва сифатсиз дори ишлаб чиқаришда айблаган, холос. Ўзбекистонда сироп мавзуси кўтарилган пайтда яъни 2022 йилнинг ноябрь, декабрь ойларида Ҳиндистон полицияси Marion Biotech Pvt. Ltd. корхонасининг сифатсиз дорилари сабаб Ўзбекистонда болалар заҳарланаётгани ҳақида маълумот олган. Ундан кейинги жараёнлар, жумладан марҳумлар 68 нафар экани, 16 нафар бола ногирон бўлиб қолгани ҳақидаги маълумотлар эса уларга етказилмаган. Шу сабаб Ҳиндистон қонунчилиги бўйича Сачин бошчилигидаги ишлаб чиқарувчи корхона масъулларига енгил айбловлар қўйилган. Бу оғирдир, аммо биз бунинг ечимини шунда кўряпмиз. Ҳиндистоннинг барча дорилари киришига чеклов қўйсак, Ҳиндистон томоннинг ўзи Сачинни ушлаб беради, — дейди адвокат.
Изоҳ (0)