Ўзбекистондаги йирик маҳаллий ишлаб чиқарувчи корхона Jurabek laboratories таъсисчиси, Сардор Кариевнинг онаси Мунира Кариева Ўзбекистонда энг камида 68 нафар боланинг ўлими ва 16 нафар боланинг ногирон бўлиб қолишига олиб келган “Док-1 Макс” жабрланувчиларига суд томонидан белгиланган 75 миллиард 756 миллион сўм миқдоридаги маънавий зарарни тўлаб бериш таклифи билан чиққани ҳақида хабар берилганди. Мунира Кариева бу пулларни қай тартибда ва қанча муддатда тўлаб бермоқчилиги очиқланди. Бу ҳақда “Дарё” журналисти хабар берди.
Мунира Кариевнинг ишончли вакилларига кўра, Сардор Кариевнинг онаси ўғлига озодликдан маҳрум қилиш билан боғлиқ бўлмаган жазо қўлланса, дастлабки тўлов сифатида 7,5 миллиард сўм тўловни бирданига амалга оширишни режалаштирган. Шунда бу пуллар 72 нафар жабрланувчига биринчи ой учун 100 миллион сўмдан, 4 нафар жабрланувчига 50 ва 8 нафар жабрланувчига 20 миллион сўмдан тегади.
Иккинчи ойдан бошлаб жабрланувчиларнинг 72 нафарига ҳар ойда 25 миллион сўмдан, 4 нафарига 12,5 миллион сўмдан, 8 нафарига эса 5 миллион сўмдан тўлаб берилади. Сўнгги 36-ойда эса 72 нафар жабрланувчининг ҳар бири 50 миллион сўмдан, 4 нафари 25 миллион сўмдан ва қолган 8 нафари 10 миллион сўмдан пул олади. Шундай қилиб Кариевнинг онаси 36 ойда дастлабки инстанция ҳукмида ёзилган 75 миллиард 756 миллион сўмлик товон пулини қоплаб беради. Она бунинг учун ўғлига тайинланган 18 йил озодликдан маҳрум қилиш жазоси ўзгартирилиб, унга озодликдан маҳрум қилиш билан боғлиқ бўлмаган жазо тайинланиши лозимлигини илтимос қилган. Шунингдек, судлов ҳайъати уларга суд мажлислари давомида қўшимча мажбурият юкласа, уни ҳам кўриб чиқишга тайёрлигини маълум қилган.
Сиздан илтимос, ушбу аризамда билдирган фикрларим апелляция суди жараёнида эътиборга олиниб, биринчи инстанция суди ҳукмининг ўғлим — С.Кариевга нисбатан жазо тайинлаш қисми бекор қилиниб, унинг озодликка чиқарилишини ва жабрланганларга тўланиши керак бўлган маънавий зарар пулини уч йил ичида бўлиб-бўлиб тўланиши бўйича муддат белгилаб берилишини сўрайман, — дейилганди Мунира Кариеванинг судга киритган аризасида.
2022 йилнинг октябрь, ноябрь ва декабрь ойларида болалар шамоллашига қарши қўлланган “Док-1 Макс” ва “Амбронол” сиропи 2023 йилнинг январь ойида мамлакатда “Док-1 Макс” фожиаси сифатида бўй кўрсатди. Фожианинг дастлабки қурбонлари ҳақида хабар берган масъуллар марҳум болалар сони 65 нафар эканини очиқлаган бўлса, кейинчалик бу рақамлар 68 нафарга етгани маълум бўлди. 2022 йилнинг декабрь ойида тармоқларда Самарқанд шаҳридаги дорихоналардан харид қилинган “Док-1 Макс” таблетка ва сироп дори воситаларини қабул қилган беморларда турли ножўя таъсирлар кузатилгани ҳақида хабарлар тарқалганди. Фармацевтика тармоғини ривожлантириш агентлиги ушбу вазиятни дарҳол назоратга олди. Заҳарли сироп ҳақида жамоатчиликка ошкор қилган Самарқанд вилояти Болалар кўп тармоқли тиббиёт маркази бош врачининг ёзишича, икки ойда 21 киши шу дори воситаси қабулидан сўнг шикоят қилган. 17 нафар боланинг аҳволи ўта оғир бўлиб, уларнинг 15 нафарида ўлим ҳолати кузатилган.
2024 йилнинг 26 февраль куни Ўзбекистонда 68 нафар боланинг ўлими, 16 нафар боланинг ногирон бўлиб қолишига олиб келган “Док-1 Макс” иши бўйича суднинг якуний ҳукми эълон қилинганди. Ҳукмга кўра, судланувчиларнинг 7 нафари озодликдан маҳрум қилинган бўлса, 14 нафарининг озодлиги чекланди. Шунингдек, бир нафари ахлоқ тузатиш ишларига жалб этилиши белгиланган бўлса, яна бир нафари 17 миллион сўмлик жаримага тортилган. 68 нафар боланинг қонуний вакилларига 6 нафар судланувчи ҳисобидан солидар тартибда 1 миллиард сўмдан товон пули ундирилишини белгилади. Оғир тан жароҳати олиб ногирон бўлиб қолган 16 нафар ва енгил тан жароҳати олган жабрланувчиларнинг қонуний вакилларига 500 миллион ва 200 миллион сўм миқдорида товон пули ундириладиган бўлганди.
Изоҳ (0)