O‘zbekistonda “Dok-1 Maks” voqeasi sabab nogiron bo‘lib qolgan bolalarga davlat tomonidan tibbiy xizmat ko‘rsatilmoqda. Bu haqda sog‘liqni saqlash vaziri Asilbek Xudayarov jurnalistlar bilan suhbatda maʼlum qildi, deya xabar berdi “Daryo” muxbiri.
Asilbek Xudayarovning aytishicha, vazirlikda “Dok-1 Maks” dorilarini isteʼmol qilish oqibatida nogironga aylangan bolalar ro‘yxati bor.
“Dok-1 Maks” voqeasi sabab nogiron bo‘lib qolgan bolalar holidan xabar olyapmiz. Asorati borlariga kafolatlangan tibbiy yordam ko‘rsatyapmiz. Bu ish bo‘yicha hali surishtiruv va tergov jarayonlari davom etmoqda. Vazir vazifasini bajaruvchi sifatida aytamanki, baʼzi bir kasallik asoratlari bo‘ladi. Ular nogironlikka olib kelgandan keyin organik yoki fiziologik buzilishlar bo‘ladi. Fizik buzilish bo‘lsa, to‘g‘rilash mumkin. Organik buzilish bo‘lsa, uni faqat asorati bilan shug‘ullanishimiz kerak. Ro‘yxatimiz bor, ularga yordam berilyapti”, dedi vazir.
“Dok 1 Maks” voqeasi
2022-yil dekabrda Samarqand viloyatida “Dok-1 Maks” dori vositasidan zaharlanib, 15 nafar bola vafot etgan haqida xabarlar tarqaldi. Maʼlum bo‘lishicha, mazkur dorilar Hindistonning Marion Pvt. Ltd kompaniyasi tomonidan ishlab chiqarilgan. Preparat va siroplarni qabul qilgan bemorlarda nojo‘ya taʼsirlar kuzatilgan. Ekspertiza natijalariga ko‘ra, “Dok-1 Maks” shamollashga qarshi preparat va sirop bo‘lib, mahsulotning bir necha partiyasida zaharli moddalar aniqlangan. Mazkur holatdan so‘ng mamlakatdagi barcha dorixonalarda mazkur dori vositasining sotilishi taqiqlanib, ular savdodan qaytarib olingan.
Rasmiy maʼlumotlarga qaraganda, “Dok-1 Maks” O‘zbekistonda 68 nafar bola o‘limiga, 16 nafar bolaning nogironga aylanishiga sabab bo‘lgan. Mazkur hodisa yuzasidan o‘tkazilgan sud ishi joriy yil 26-fevralda yakuniga yetdi. Toshkent shahar sudlarining Jinoyat ishlari bo‘yicha sudlov hayʼati tomonidan sirop voqeasida ayblanayotgan 23 nafar sudlanuvchiga hukm o‘qildi.
Hukmga asosan, Hindiston fuqarosi, Quramax Medical MCHJ direktori Singh Ragvendra Pratarga 20 yil ozodlikdan mahrum qilish jazosi tayinlandi. U jazoni o‘tab bo‘lgach, Hindistonga deportatsiya qilinadi. Shuningdek, Farmagentlikning sobiq rahbari Sardor Kariyev 18 yil, uning o‘rinbosarlari bo‘lgan Amirxon Azimov va Nodirbek Musayevga 16-yildan ozodlikdan mahrum qilish jazosi tayinlandi. Tayinlangan jazolarni umumiy tartibli koloniyalarda o‘tash belgilandi.
Shuningdek, “Dok-1 Maks” ishini ko‘rib chiqqan sudlov hayʼati siropdan zaharlanib vafot etgan 68 nafar bolaning qonuniy vakillariga 6 nafar sudlanuvchi hisobidan solidar tartibda 1 milliard so‘mdan tovon puli undirilishini belgiladi. Og‘ir tan jarohati olib nogiron bo‘lib qolgan 16 nafar va yengil tan jarohati olgan jabrlanuvchilarning qonuniy vakillariga 500 million va 200 million so‘m miqdorida tovon puli undiriladigan bo‘lgan.
Iyul oyi boshida “Dok-1 Maks” ishi bo‘yicha apellyatsiya instansiyasi dastlabki hukmni o‘zgarishsiz qoldirgan.
Izoh (0)