Жиноят ишлари бўйича Юнусобод туман судида судья Сардор Содиқов раислигида собиқ қишлоқ хўжалиги вазири Азиз Воитов ва 49 нафар судланувчи иши кўриб чиқилаётгани хабар берилганди. Суднинг 6 сентябрь куни давом этган навбатдаги мажлисида ОАВ вакилларининг фаолияти чеклаб қўйилди. Уларга суд мажлисида фото, видео ва аудиоматериал олиш тақиқланди.
![](/static/2024/09/06/photo_2024-09-05_18-35-42-pCRXPaDz.jpg)
“Дарё” журналистининг хабар беришича, ОАВ вакиллари шундан сўнг суд залини тарк этган.
“Адвокат Абдураимов судга журналистларни киритмаслик ҳақида илтимоснома берди. Бу илтимоснома бир нечта адвокатлар ва судланувчилар томонидан қўллаб-қувватланди. Бироқ ҳамма адвокатлар ҳам буни қўлламади. Биз шу пайтда журналистларга ҳам сўз берилиб, уларнинг ҳам фикри эшитилади деб ўйлагандик. Аммо бизга навбат берилмади. Маслаҳатхонага кирган судья адвокатлар илтимосномасини қисман қаноатлантирганини айтиб, суд мажлисида журналистларнинг фото, видео ва аудиоматериаллар олишини тақиқлади. Судьяга кўра, журналистлар суд мажлисида иштирок этиб, маълумотларни қўлёзма тарзида ёзиб олиши ва шу тарзда ёритиши мумкин”, дейди “Кун.uz” интернет нашри журналисти Бахтиёр Тўхтаев.
![](/static/2024/09/06/photo_2024-09-06_21-18-25-VO6xmjtH.jpg)
Журналист суднинг айни пайтдаги ҳаракати ОАВ вакиллари фаолиятини чеклаганини айтмоқда.
“Судда сўз беришса, суд тергови пайтида фаолиятимизни қисман чеклаб, айни пайтдаги жараёнлар — судланувчиларнинг шахсига аниқлик киритилиши, айблов хулосасининг ўқиб эшиттирилиши билан боғлиқ ҳолатларда аудио, фото ва видеога рухсат беришлари кераклигини тушунтирмоқчи эдим”, — дейди журналист.
“Газета.uz” нашри мухбири Миролим Исажонов расмий ахборотларда очиқ суд дея бонг урилаётган суд ёпиқ суддан фарқли бўлмаётганини айтмоқда.
![](/static/2024/09/06/photo_2024-09-06_21-18-24-mx_mmF9o.jpg)
“Расмий баёнотларда очиқ суд дейиляпти. Лекин ичкаридаги ҳолатни кўряпсиз. Бунақа тартибда ёритгандан ёритмаган маъқул. Чунки биз журналистларга факт керак. Ўтган суд мажлисини ёзган журналистларни бўрттириб ёзди дейишяпти, эртага аудио ёки видеофакт бўлмаса бизга ҳам шундай тамғани қўйиши, судлашишгача боришлари мумкин. Шу учун бунга қаршиман ва суд мажлисидан чиқиб кетдим”, дейди журналист.
Миролим Исажоновнинг билдиришича, бугунга қадар бўлиб ўтган Нукус воқеалари ва “Док-1 Макс” судларида журналистларга ҳеч қандай тўсиқ қўйилмаган. Ушбу суд мажлисларини бугунги судьяларга намуна қилиб кўрсаца бўлади.
“Масалан Нукус воқеалари иши, шунингдек, “Док-1 Макс” айбдорлари иши кўриб чиқилган суд мажлисларида дастлаб судланувчилар ва адвокатлар ОАВ иштирокига қарши бўлса-да, судья бу ишлар жамоатчилик назоратида эканини, шунингдек, суднинг шаффофлигини таъминлаш учун ҳам мажлисларда журналистлар иштироки муҳим дея, бизнинг ишлашимиз учун замин яратганди. Нукус воқеалари суди “Газета.uz” сайти орқали онлайн ёритиб борилганди”, дейди суҳбатдош.
“Газета.uz” журналистининг қўшимча қилишича, бугунги суд мажлисида судья Сардор Содиқов телефон ўйнаб ўтирган. Журналист бу ҳолатни суратга олмоқчи бўлганида Миллий гвардия ходимлари журналистга қаршилик кўрсатиб, судья рухсатисиз суд залида суратга олиш мумкин эмаслигини айтган.
“Қалампир.uz” журналисти Ҳулкар Муртазоеванинг айтишича, бугунги судда давлат айбловчиси ҳам журналистларнинг суддан чиқариб юборилишини сўраган.
![](/static/2024/09/06/photo_2024-09-06_21-18-23-g-J2bhCi.jpg)
“Судга кириш мумкин экан, аммо ёритиш мумкинмас, ёзиб олиш мумкин, диктофон ишлатиш мумкинмас, кимлар кўрсатма берганини ёзиш мумкин, лекин нима деб кўрсатма берганини ёзиш мумкин эмас экан. Унда биз қандай ишлаймиз?”, дейди Ҳулкар Муртазоева.
“Севимли” телеканалининг “Замон” информацион дастури журналисти Мўтабар Нурмуҳаммедованинг айтишича, судья Сардор Содиқов очиқ судни ёпиқ судга айлантириш учун адвокатлардан қурол сифатида фойдаланган.
![](/static/2024/09/06/mmm111-2SvRY00n.jpg)
“Бу судда иштирок этаётган адвокатларнинг аксарияти журналистларни танимас, билмас экан. Шундай бўлса-да, бизни ҳуқуқий билимсизликда айблашгани шахсан мени хафа қилди. Айнан шу судга раислик қилувчи судья бизнинг неларга қодирлигимизни, қандай журналист эканимизни яхши биларди. Адвокатлар бизнинг касбий маҳоратимизга ишонмаса судьядан сўрашлари мумкин эди. Менинг назаримда судья очиқ судни ёпиққа айлантириш учун айнан адвокатлардан, уларнинг фикрларидан қурол сифатида фойдаланди”, дейди Мўтабар Нурмуҳаммедова.
“Севимли” телеканали мухбири ҳам судья Сардор Содиқов суд мажлисида телефон ўйнаб ўтирганини тасдиқлади.
“Судда бизга фото, видео ва аудио олишга тўсиқ қўйилгач, чиқиб кета бошладик. Шунда судланувчиларнинг яқинлари ва айрим адвокатлар телефон рақамларимизни сўрашди. Нега десак, агар суднинг қарори адолатсиз бўлса, уларни қониқтирмаса бизга мурожаат қилишларини айтишди. Энг ёмони адвокатлар ва судланувчилар ОАВдан қурол сифатида фойдаланишмоқчи бўляпти. Бугунги суд мажлисини ёритишга келганда эса ёвқараш қилиб, эркин фаолиятимизга тўсиқ бўлишмоқда”, дейди журналист.
Аввалги суд мажлисларида судда сўз олган адвокатлардан бири Темур Раҳматов интернет нашрларининг бирида собиқ вазир Азиз Воитов иши судда кўриб чиқилгани ва 7 йилга озодликдан маҳрум қилингани ёзилганини айтиб, журналистларни нотўғри ахборот тарқатаётганликда айблаганди. Шунингдек, судда сўз олган ва исм-шарифини айтмаган яна бир адвокат судда қатнашаётган журналистлар хорижликлар агенти бўлиши мумкинлигини айтиб, шу боис уларга судни ёритишни тақиқлаш кераклигини таклиф қилганди.
Изоҳ (0)