Ўзбекистонда энг камида 68 нафар боланинг ўлими, 16 нафар боланинг ногирон бўлиб қолишига сабабчи бўлган “Док-1 Макс” иши бўйича суд ҳукми эълон қилинганди. Шундан сўнг мазкур жиноят ишини кўриб чиққан судлов ҳайъати раиси — судья Мусо Юсупов иштирокида матбуот анжумани ташкил этилди. Бу ҳақда “Дарё” журналисти хабар берди.
Матбуот анжуманида сўз олган “Дарё” журналисти судья Мусо Юсуповга юзланиб, “сиропдан заҳарланиб вафот этган, аммо расмийлар рўйхатидан тушиб қолган 69-қурбон ҳамда дори сабаб ногирон бўлиб қолган яна бир бола масаласи очиқ қоладими”, деб сўради.
Бизда ҳозир кўриб чиқилган жиноят ишидан ташқари жиноят иши ҳам мавжуд, яъни айнан Самарқанд вилояти соғлиқни сақлаш бошқармаси бошлиғига нисбатан жиноят иши қўзғатилиб, ҳозирда қамоқ эҳтиёт чораси қўлланилган. Тергов жараёнида, айнан шу тергов жараёнига бошқа шахслар ҳам айбланувчи сифатида жалб қилинган. Шу билан биргаликда сиз айтган иккита ҳолат, ундан ташқари ҳам фуқаролар мурожаат қилмоқда. Бугунги кунда дастлабки суд жараёнини кузатган инсонлардан янги мурожаатлар келмоқда. Улар “бизда ҳам шундай ҳолат бўлган”, деб мурожаат қилишмоқда. Бугун ҳукм ўқилди, энди яна мурожаатлар кўпаяди. Шу сабаб терговда алоҳида жиноят иши ажратилган, — дейди “Док-1 Макс” ишини кўриб чиққан судья Мусо Юсупов.
Судьянинг билдиришича, мазкур масала юзасидан судга Сирдарё ва Жиззах вилоятларидан мурожаатлар келиб тушган.
Биз ушбу мурожаатларни тергов органига юборганмиз. Тергов органи биринчи инстанцияда судланаётган шахсларнинг айримларига қамоқ эҳтиёт чорасини қўллаган. Ўша ҳолат бўйича алоҳида жиноят ишида тергов ҳаракатлари давом эттириляпти. Мазкур ҳолатда яна жабрланувчилар бўлса, улар эшитилиб, тергов ишига қўшилади, — дейди судья.
Мусо Юсуповнинг қўшимча қилишича, юқорида тилга олинган жабрланувчилар мурожаати дастлабки суд жараёнига қўшилганида “Док-1 Макс” суди яна чўзилар эди.
Хабарингиз бор, “Док-1 Макс” судида икки марта жиноят иши янгидан бошланди. Жиноят иши янгидан бошлангач, яна суднинг бошига қайтиб, судлов очилиб, айблов хулосаси ўқиб эшиттирилади. Ҳар битта янги айблов келгач, судга қўшаверсак, биз судни ҳар сафар бошидан бошлашимизга тўғри келар эди. Бу олти ой давом этган судимизнинг яна чўзилишига олиб келарди. Қўшимча жиноят иши яқин кунларда судга чиқади, — дейди у.
Эслатиб ўтамиз, “Док-1 Макс” иши якунига кўра, ҳиндистонлик ишлаб чиқарувчининг Ўзбекистондаги расмий вакили С.Р.П. 20 йилга, Фармацевтика тармоқларини ривожлантириш агентлигининг собиқ раҳбари Сардор Кариев 18 йилга, унинг ўринбосарлари — Амирхон Азимов ва Нодирбек Мусаевлар 16 йил муддатга озодликдан маҳрум қилинди.
Изоҳ (0)