Ўзбекистонда энг камида 69 нафар боланинг ўлими ва 16 нафар боланинг ногирон бўлиб қолишига олиб келган “Док-1 Макс” сиропи бўйича 23 нафар судланувчига ҳукм ўқилгани ҳақида хабар берилганди. Судда айтилишича, уларнинг 7 нафари озодликдан маҳрум қилинган, 14 нафарининг озодлиги чекланган. Бир нафари ахлоқ тузатиш ва яна бир нафари жаримага тортилганди. Судьянинг якуний хулосасида билдирилишича, “Док-1 Макс” фожиасини кўриб чиққан судда адвокатлар саволидан омон қолиб, сувдан қуруқ чиққан яна бир собиқ мансабдорга ва бир неча шифокорларга жиноий иш очилиши мумкин.
Шу билан биргаликда, Жиноят-процессуал кодексининг 417-моддаси тартибида хабарнома юбориш ҳақида ҳам қарорга келинди. Жумладан, Фармацевтика тармоғини ривожлантириш агентлигининг директори ўринбосари лавозимида ишлаган Улуғбек Эгамовга, шунингдек, Олмалиқ шаҳар болалар шифохонаси лор-шифокори Аброр Исломовга, Қизириқ туман тиббиёт бирлашмаси болалар бўлими шифокори Элёр Бобомуродовга, Қизириқ туман кўп тармоқли шифохонасининг болалар бўлимида ишловчи Хуршид исмли шифокорга, Зарафшон шаҳридаги тиббиёт бирлашмасида марҳум Дамир Шокировга қараган шифокорларга нисбатан жиноят иши қўзғатиш ҳақида тергов органига хабарнома юбориш бўйича тўхтамга келинди, — дейди “Док-1 Макс” айбдорларига ҳукм ўқиган судья Мусо Юсупов.
Улуғбек Эгамов ким? Унинг “Док-1 Макс” ишига қандай алоқаси бор?
Улуғбек Эгамов расмий тайинлов сабаб 2022 йилнинг 12 апрель куни тармоқларда кўриниш бериб, Фармацевтика тармоғини ривожлантириш агентлиги директорининг биринчи ўринбосари сифатида жамоатчиликка танилганди. Кўп ўтмай, аниқроғи, 2023 йилнинг 20 февралида “Док-1 Макс” ишида айбланиб, қамоққа олинган агентлик директори Сардор Кариев ўрнида иш бошлади.
“Док-1 Макс” судининг 2023 йил 15 ноябрь куни бўлиб ўтган мажлисида у гувоҳ сифатида тергов қилинди. Судда сироп иши бўйича айбдор деб топилган Сардор Кариев аслида унинг ўрнида Улуғбек Эгамов бўлиши кераклигини, сироп иши бўйича асосий айбдор у эканини айтганди.
Сен “зам” бўлиб келганингдан кейин агентликда барча қилғилиқлар бошланган экан. Мен буни тергов пайтида билдим, шу пайтгача кўзим кўр бўлиб, билмай юрган эканман. Бу “зам” бўлиб, яхши ишлаяпти, деб юрган эканман. Лекин сени деб мен ҳозир шу ерда ўтирибман, — деганди Сардор Кариев.
Сардор Кариев, шунингдек, тергов пайтида у Ҳиндистоннинг “Кураракс” дорисини (33 минг доллар пора эвазига инспекцион текширувдан олиб ташланган дори воситаси) инспекцион текширувдан олиб ташлаш бўйича агентликдан топшириқ бўлганини, бу иш унинг номидан Улуғбек Эгамов топшириғига кўра амалга оширилганини маълум қилганди.
Фармацевтика тармоғини ривожлантириш агентлигининг собиқ раҳбари Сардор Кариев судда гувоҳ билан юзлашар экан, “Кураракс” дорисини инспекцион текширувдан олиб ташлаш бўйича менга мурожаат қилганмидинг, деди. Гувоҳ Улуғбек Эгамов саволга жавобан бу бўйича унга мурожаат қилмаганини билдирди. Шундан сўнг судланувчи гувоҳдан дорини инспекцион текширувдан олиб ташлаш учун олинган 33 минг долларнинг қанча қисми унга тегганини сўради. Гувоҳ бу пулларни кўрмаганини маълум қилди.
Сен ифлосни деб, 11 ойдан бери мана шу ерда ўтирибман. Суд биносидан чиқиб кетаётганингда оила аъзоларимнинг кўзига қараб ўтиб кетгин, — деди Сардор Кариев.
Сардор Кариев судда Улуғбек Эгамовнинг асосий айбдор эканини айтган ягона инсон эмасди, ўша суд мажлисида Кариевдан ташқари яна 6 нафар судланувчи ҳамда бир нечта адвокатлар Улуғбек Эгамов сироп воқеасида асосий айбдор эканини билдириб, унга қарши жиноят иши очилишини сўраганди. Адвокатлар илтимоснома ҳам киритганди. Бироқ бир ойлик танаффусдан қайтган суд Улуғбек Эгамовга эмас, бошқа шахсларга қарши жиноят иши очилганини маълум қилди. Яна Улуғбек Эгамов масаласи очиқ қолди.
Суд терговида адвокатлар ва судлов ҳайъати томонидан сўроқ қилинган Улуғбек Эгамов ваколатли вазифада ўтирган пайтда Сардор Кариевнинг номидан унинг ўринбосари Амирхон Азимовга ҳиндистонлик ишлаб чиқарувчининг яна бир дори воситаси “Кураракс”ни инспекцион текширувдан олиб қолиш ва айнан шу дори рўйхатдан ўтганини тасдиқловчи гувоҳнома бериш кераклиги хусусида топшириқ бергани айтилди. Адвокатлар мазкур топшириқ Telegram мессенжери орқали берилганини, буни исботлаш учун уларда скриншотлар борлигини бир неча бор таъкидлади. Судлов ҳайъати раиси ҳам бу ҳужжатдан бохабар экани маълум бўлди. Бироқ Эгамов масаласи номаълум сабабларга кўра ўша пайтда ҳам ёпиқ қолди.
Изоҳ (0)