Кеча, 22 октябрь куни Ижтимоий тармоқларда фуқаролик ишлари бўйича Фарғона туманлараро судининг судьяси очиқ суд мажлисидан блогерни ҳайдаб чиқаргани ҳақида хабар қилинган эди.
Унда айтилишича, блогер судья Д.Исматуллаева раислигида кўриб чиқилаётган фуқаролик низосига доир суд мажлиси жараёнини видеотасвирга олишни сўраб илтимоснома киритган. Илтимосномани жойида ажрим чиқариб, рад қилишдан ташқари, судья блогерни ҳам суд мажлисидан чиқариб юборган.
“Дарё” манбасига кўра, мазкур ҳолат бўйича судьяга нисбатан хизмат текшируви тайинланган. Ушбу маълумотни судьялар олий кенгаши матбуот котиби Турсунали Акбаров тасдиқлади.
Айтилишича, хизмат текшируви Фарғона вилоят судлари судьялари малака ҳайъати томонидан ўтказилади ва натижаси бўйича қўшимча ахборот берилади.
Аввалроқ Тошкент вилоятида мантиясиз, баённома юритмай суд ишини кўргани учун судья ва суд раиси огоҳлантирилган эди.
Маълумот учун, 2024 йил давомида 32 нафар судьянинг ваколати муддатидан аввал тугатилган. Шундан 13 нафари судьялик қасамёдини бузгани учун, 6 нафари Судьялар одоби кодекси талабларини бузгани учун ва 13 нафар судьянинг ўзи ариза бергани учун ваколати муддатидан аввал тугатилган.
Изоҳ (0)