Республикачилар партиясидан президентликка номзод Дональд Трамп CBS News телеканалига мактуб йўллаб, рақиби Камала Ҳарриснинг “60 дақиқа” кўрсатувига берган интервьюсининг тўлиқ, таҳрир қилинмаган матнини чоп этишни талаб қилди. Бу ҳақда Fox News хабар берди.
Телеканал маълумотларига кўра, мактуб “60 дақиқа” кўрсатуви Трампнинг Ҳаррис билан бўлган интервьюни таҳрирлаш борасидаги айбловлари “ёлғон” эканини айтганидан кейин юборилган. Хабар қилинишича, хат Трампнинг юридик маслаҳатчиси Эдвард Палтзик томонидан тузилган ва сиёсатчи номидан ёзилган.
“Биз сиздан Камала Ҳарриснинг “60 дақиқа”га берган интервьюсининг тўлиқ, таҳрир қилинмаган матнини зудлик билан тақдим этишингизни ва чоп этишингизни талаб қиламиз”, дейилади мактубда.
Трамп телеканалдан интервью билан боғлиқ барча ёзишмалар ва ҳужжатларни “йўқ қилишдан тийилиш”ни, шунингдек, “мумкин бўлган суд жараёнларини ҳисобга олган ҳолда” таҳрирлаш ҳақидаги маълумотларни сақлаб қолишни талаб қилган.
Аввалроқ Трамп CBS телеканали продюсерларини Ҳарриснинг “60 дақиқа” дастурида берган интервьюсига жиддий тузатишлар киритганликда айблаган эди. Кейинроқ у телеканални трансляция лицензиясидан маҳрум қилишни талаб қилган.
Изоҳ (0)