Собиқ қишлоқ хўжалиги вазири Азиз Воитов ва 49 нафар судланувчи иши ёпиқ судда кўриб чиқиладиган бўлди

Жиноят ишлари бўйича Юнусобод туман судида судья Сардор Содиқов раислигида собиқ қишлоқ хўжалиги вазири Азиз Воитов ва 49 нафар судланувчи иши кўриб чиқилаётгани ҳақида хабар берилганди. Суднинг 6 сентябрь куни давом этган мажлисида ОАВ вакиллари фаолияти чеклаб қўйилган бўлса, 12 сентябрь куни давом этган мажлисида суд иши ёпиқ экани маълум қилинди ва барча журналистлар суд залидан чиқариб юборилди. Бу ҳақда суд мажлисида иштирок этган “Дарё” журналисти хабар берди. 

Бунга фуқаровий даъвогарлардан бири — Қишлоқ хўжалиги вазирлиги қошидаги хизмат кўрсатиш агентлигининг шу ҳақдаги илтимосномаси сабаб бўлди. 

Суднинг 12 сентябрдаги мажлисида дабдурстдан пайдо бўлган фуқаровий даъвогарлардан бири — Қишлоқ хўжалиги вазирлиги қошидаги хизмат кўрсатиш агентлиги вакили Ғофур Маҳкамов судга илтимоснома киритиб, мажлисни ёпиқ тарзда давом эттиришни сўради. 

Фуқаровий даъвогарлардан яна бири “Миллий банк” вакиллари аввалги суд мажлисларида ҳам қатнашган экан. Судья бу сафарги суд мажлисида вакилнинг ўзгариб қолишидан ажабланар экан, унинг шахсига аниқлик киритди. Аввалги суд мажлисида бошқа биров қатнашган, шекилли, бу сафарги вакилнинг исм-фамияси Камолахон Исаева экани ойдинлашди. Бироқ вазирлик қошидаги агентлик вакили фуқаровий даъвогар сифатида суд мажлисида бугун пайдо бўлди. Ва бугун судни ёпиқ ўтказиш ҳақида илтимоснома киритди, дейди суд мажлисида қатнашган ОАВ вакилларидан бири. 

Судда вазирлик қошидаги агентлик вакилининг илтимосномасини тинглаган адвокатлар, жумладан, адвокат Қиличов, Раҳматов, Алимов ва Янгибоевлар ҳамда аксарият судланувчилар бу илтимосномани рад этишни, боиси Жиноят-процессуал кодексида 2 хил ҳолатда давлат сири ва жинсий зўравонлик билан боғлиқ ҳолатларда ёпиқ суд мажлислари бўлиши белгиланганини эслатди. 

Суд ишига раислик қилувчи Сардор Содиқов бир неча адвокатлар ва судланувчиларнинг суд мажлиси очиқ бўлишини сўрагани, шунингдек, саноқли адвокатларнинг судга ҳавола қилиши ҳақидаги сўзларини тингласа-да, “хизмат доирасидан фойдаланиш мумкин бўлган маълумотлар янграшини инобатга олган ҳолда шундай қарорга келдик”, дея судни ёпиқ деб эълон қилди. Ҳамда журналистлардан буни тўғри тушунишни сўради.

Эслатиб ўтамиз, суднинг 6 сентябрь куни давом этган мажлисида ОАВ вакиллари фаолияти чеклаб қўйилгач, “Кун.уз”, “Газета.уз” ва “Қалампир.уз” сайти журналистлари “Дарё” журналистининг саволига жавобан буни қоралашини маълум қилганди. 

Масалан, Нукус воқеалари иши, шунингдек, “Док-1 Макс” айбдорлари иши кўриб чиқилган суд мажлисларида дастлаб судланувчилар ва адвокатлар ОАВ иштирокига қарши бўлса-да, судья бу ишлар жамоатчилик назоратида эканини, шунингдек, суднинг шаффофлигини таъминлаш учун ҳам мажлисларда журналистлар иштироки муҳим дея, бизнинг ишлашимиз учун замин яратганди. Нукус воқеалари суди “Газета.уз” сайти орқали онлайн ёритиб борилганди, деганди “Газета.уз” журналисти Миролим Исажонов. 

Шундан сўнг, Коррупцияга қарши курашиш агентлиги Азиз Воитов суди жамоатчилик учун очиқ тарзда ўтказилиши керак, деган чақириқ билан чиқди. 

Ўзбекистон Республикаси президентининг 2021 йил 16 июндаги ПФ-6247-сон фармонига мувофиқ, давлат хизматчиларининг касбий фаолияти билан боғлиқ ҳуқуқбузарликларга оид ишлар бўйича суд мажлислари телеканаллар, шунингдек, интернет тармоғи орқали жонли эфирга узатилиши лозимлиги белгиланган. Шунга асосан, Коррупцияга қарши курашиш агентлиги мазкур суд мажлиси юқоридаги Фармон талаблари асосида жамоатчилик учун очиқ тарзда ўтказилиши мақсадга мувофиқ эканлигини маълум қилади, деганди масъуллар.