Тошкент вилоятида икки корхонанинг 559 минг доллар ва 1,5 млрд сўми фирибгарлик йўли билан қўлга киритилгани аниқланди

Тошкент вилоятида жуда катта миқдордаги пул фирибгарлик йўли билан қўлга киритилиб, учта енгил ва битта юк машина сотиб олингани аниқланди.

Бош прокуратура ҳузуридаги департаментнинг Оққўрғон туман бўлими томонидан тадбиркорлик субъектларининг ҳуқуқларини ҳимоя қилиш юзасидан ўтказилган терговга қадар текширувда “А.О.” МЧЖ таъсисчиси З.К. ва бошқалар 2021—2023 йиллар давомида “М.Г.” хусусий корхонаси ва “Б.О.” МЧЖга 2 700 тонна чигит маҳсулотлари етказиб бериши эвазига уларнинг 559 минг АҚШ долларини нақд ҳолда ҳамда 1,5 миллиард сўмини пул ўтказиш йўли билан қўлга киритгани маълум бўлган. 

Шунингдек, МЧЖ таъсисчиси З.К. ва ишчиси Э.Х. фирибгарлик йўли билан қўлга киритган маблағлари ҳисобидан Trailblazer, BYD Yuan Plus ва Cobalt русумли енгил ҳамда “Ситрак” русумли юк автотранспорт воситаларини сотиб олгани аниқланган.

Мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.