Жиноят ишлари бўйича Муборак туман судида кредитга автомобиль олиб беришни ваъда қилиб, 70 нафар фуқаронинг 1,5 миллиард сўм маблағини «еб кетган» фуқароларга суд ҳукми ўқилди. Бу ҳақда «Дарё»га суд раиси Алишер Қаҳҳоров маълум қилди.
Маълум бўлишича, суд иши 2022 йилнинг 17 май куни ниҳоясига етган.Суд раисининг маълумот беришича, фуқаролар — Т.З. ва А.Ш. уюшган жиноий гуруҳ ташкил қилиб, Тошкент шаҳрининг Учтепа туманида «Lid car» МЧЖ ташкил қилган. Мазкур МЧЖ номидан фуқароларга бир йилдан уч йилгача бўлган муддатга 15 фоизли кредит асосида автомобиль олиб беришни ваъда қилган.
«Улар харидорга сотиб олмоқчи бўлган автомобили нархининг 20 фоизи ва МЧЖ хизмати учун 1 миллион 900 минг сўм миқдордаги тўловларни амалга ошириши кераклиги ҳақида айтиб, эвазига Ўзбекистонда ишлаб чиқарилаётган Malibu, Lacetti, Nexia-3, Tracker, Cobalt, Damas, Labo ва бошқа русумли автомашиналарни 90 иш куни ичида олиб бериш мажбуриятини олган. Бироқ айтилган ваъдаларни бажармаган.
Жиноий гуруҳ аъзолари шу тариқа фуқаролар ишончига кириб, Тошкент шаҳрининг Юнусобод туманида, Қашқадарё вилоятининг Шаҳрисабз ва Қарши ҳамда Андижон шаҳрида «Lid car» МЧЖ филиалларини ташкил қилиб, «Авто кредит» номли брошюралар орқали 2020 йилнинг июнь ойидан 2021 йил март ойи ўрталарига қадар фуқаролардан 16 миллион сўмдан 60 миллион сўмгача маблағларни қабул қилиб олган», — дейди судья Алишер Қаҳҳоров.
Қўшимча қилинишича, МЧЖ вакиллари пулларни харидорлардан нақд шаклда қабул қилиб олиб, маблағларни МЧЖ ҳисоб рақамига кирим қилмаган. Шу тарзда 70 нафар фуқаронинг жами 1 миллиард 561 миллион 634 минг 700 сўм пул маблағларини алдаш йўли билан қўлга киритган.
Суд судланувчиларни Жиноят кодексининг 168-моддаси 4-қисми «а» (жуда кўп миқдорда фирибгарлик) ҳамда «в» (уюшган гуруҳ томонидан ёки унинг манфаатларини кўзлаб содир этилган фирибгарлик) бандлари билан айбли топиб, Т.З.га 10 йил муддатга, А.Ш.га 9 йил муддатга озодликдан маҳрум қилиш жазосини тайинлаган.
Изоҳ (0)