Тошкент шаҳрида фуқароларга уй ва машина олиб беришни ваъда қилиб, уларни чув туширган шахсга суд ҳукми ўқилди. Бу ҳақда “Бу кун” информацион дастурида маълум қилинди.
Қайд этилишича, МЧЖ раҳбари ўзига таниш бир гуруҳ шахслар билан жиноий тил бириктириб, 200 нафардан ортиқ фуқаронинг 15 миллиард сўм пулини қўлга киритган.
Судланувчининг сўзларига кўра, фирма 2022 йил январь ойида очилган. У мазкур фирмага март ойида ишга жойлашган.
“Мен мартдан бошлаб ишга киришган бўлсам, нотариус орқали 50 та машина, 10 тага яқин уй-жой олиб берилган. Фирибгарлик қилиб ҳеч кимнинг пулини олмаганман. Норасмий раҳбар пулларни ечиб кетгани ҳақида бизга ҳам маълумот берилган. Лекин у қаердалиги ҳақида хабарим йўқ”, — дейди судланувчи.
Жабрланувчилардан бири машина олиш учун бошланғич тўлов сифатида 70 миллион сўм, бошқаси эса уй учун 178 миллион сўм берганини билдирган.
Иқтисодиёт соҳасида кирувчи жиноятларни содир этган 32 ёшли судланувчи Жиноят кодексининг 168-моддаси (фирибгарлик) 4-қисми “а” бандида назарда тутилган жиноятни содир этганликда айбли деб топилиб, 9 йил муддатга озодликдан маҳрум этилди.
“Авто 60 ой” иши
“Авто 60 ой” МЧЖнинг мансабдор шахслари ва бошқаларга нисбатан 2019 йил 12-октябрь куни Жиноят кодексининг 188-1-моддаси 1-қисми (пул маблағларини ва (ёки) бошқа мол-мулкни жалб этишга доир ноқонуний фаолият) билан жиноят иши қўзғатилган эди.
Тергов жараёнида Ж. Баҳодиров ўзининг жиноий шериклари билан олдиндан тил бириктириб, бир гуруҳ бўлиб, “Авто олтмиш ой” ва Cаtalea Media МЧЖ ва ЯТТ “Ж.Баходиров”ни ташкил этиб, 3 ой муддат ичида Ўзбекистонда UzAuto Motors АЖ томонидан ишлаб чиқарилган автомашиналарни етказиб беришни ваъда қилиб, автомашина русумига қараб, 1 миллион сўмдан 10 миллион сўмгача бўлган миқдорда пул олиб, маблағларни қўлга киритгани аниқланган.
Жиноят иши бўйича “Авто 60 ой” МЧЖ бош офисидан олинган бухгалтерия ҳужжатларидаги маълумотлар бўйича 19 344 дан ортиқ шахслар билан шартномалар тузгани аниқланган ва ушбу шартномалар жиноят ишига қўшилган. Тергов ҳаракатлари давомида жами етказилган моддий зарар 47,7 миллиард сўм экани аниқланиб, шундан 36,8 миллиард сўм ундирилган. Суд ҳукми билан фирма масъуллари 4 йилдан 8 йилгача озодликдан маҳрум этилганди.
Изоҳ (0)