Сўнгги йилларда Ўзбекистонда болалар нафақаси ва моддий ёрдам тайинланишида бир қанча ҳолатларда ўзига тўқ оилалар ушбу турдаги нафақаларни олиши кузатилган. Бу ҳақда Пенсия жамғармаси маълум қилди.
Фото: “Дарё” / Мадина Нурман
Қайд этилишича, айрим ўзига тўқ фуқаролар ўз мулкларини қариндошлари номига расмийлаштириб, болалар нафақаси ва моддий ёрдам олиб келган.
“Шу ва бошқа турдаги ҳолатларнинг олдини олиш, болалар нафақаси ва моддий ёрдамни чиндан ҳам унга муҳтож оилаларга етиб боришини таъминлаш мақсадида жорий йилнинг 10 ноябрь куни Вазирлар Маҳкамасининг янги қарори қабул қилинди. Мазкур қарорга мувофиқ, 2024 йил мартдан бошлаб оиланинг номига расмийлаштирилмаган, лекин фойдаланувида бўлган автотранспорт воситалари, кўчмас мулклари, чорва моллари фуқароларнинг аризаларига мувофиқлиги жойига чиққан ҳолда ўрганилиш тартиби жорий қилинади. Бу орқали болалар нафақаси ва моддий ёрдам тайинланишида адолат мезонлари мустаҳкамланади”,— дея хабар берган жамғарма.
Аввалроқ “Дарё” мухбири билан суҳбатда Пенсия жамғармаси бўлим бошлиғи Сардор Файзуллаев ушбу қарор билан 2024 йил 1 апрелдан бошлаб “Ягона интерактив давлат хизматлари” портали орқали болалар нафақаси ва моддий ёрдам олиш учун онлайн мурожаат қилиш тартиби жорий этилишини айтганди.
“Бунда онлайн аризани фуқаролар ёки уларнинг номидан (фуқаро розилиги билан) Ижтимоий ҳимоя миллий агентлигининг ҳудудлардаги ходимлари киритиши мумкин бўлади”,—деган жамғарма масъули.
Яна бир янги тартибга биноан, 2023 йил декабрдан бошлаб болалар нафақаси ва моддий ёрдам тайинланган оиланинг иқтисодий аҳволи ҳар ойда ўрганиб борилади. Агар оиланинг иқтисодий ҳолатида яхшиланиш кузатилса, масалан, у мол-мулк, янги автомобиль харид қилгани аниқланса, дастур моддий ёрдам бериш мезонларини қайтадан автоматик ўрганади. Оила ўша мезонларга мос келмай қолган тақдирда, пул бериш тўхтатилади.
“Амалдаги тартибда болалар нафақаси тайинланган оиланинг иқтисодий ҳолати бир йил ичида яхшилансада, унга белгиланган муддат давомида пул бериш тўхтатилмас эди. Чунки бунинг ҳуқуқий асоси бўлмаган. Янги қарор билан шу асос яратилди. Энди дастур барчасини автоматик тарзда аниқлайди. Айтайлик, нафақа тайинланган фуқаро машина сотиб олса, Ички ишлар вазирлиги ахборот тизими орқали дастурга маълумот келиб тушади ва ўша оилага моддий ёрдам бериш тўхтатилади”—деган Сардор Файзуллаев.
Маълумот учун, Ўзбекистонда 2,2 миллиондан ортиқ кам таъминланган оилаларга болалар нафақаси ва моддий ёрдам пуллари тўланмоқда. 2023 йилда ушбу тўловлар учун давлат бюджетидан жами 12,2 триллион сўм йўналтирилади.
Изоҳ (0)