Суртма, чой ва смузи: Грипп билан касалланганда асқатадиган 5 рецепт

Албатта, ушбу табиий дармон воситалари вирус билан кураша олмайди, аммо улар нафас йўли инфекциясининг аломатларини енгиллаштиришга ёрдам беради.

Витаминли смузи

Ушбу ичимлик иммунитет тизимини қўллаб-қувватловчи ва организмнинг инфекцияга чидамлилигини ошириш учун мўлжалланган. Бундан ташқари, смузи вазнга умуман таъсир қилмайди.

Керакли маҳсулотлар:

• апельсин — 1 дона;
• сабзи — 1 дона;
• лавлаги — 1 дона;
• олма — 1 дона;
• исмалоқ — 50 грамм;
• қорағат — 200 грамм;
• сув — 150 мл.

Мева ва сабзавотлар тозаланади. Уруғлари олиниб, майда бўлакларга бўлинади. Барча маҳсулотлар бир хил масса бўлгунга қадар блендерда аралаштирилади. Агар керак бўлса, бироз қайнатилган сув қўшилади.

Малинали чой

Малина анъанавий тиббиётда фойдаланиладиган энг машҳур иситмани туширувчи восита ҳисобланади. Резавор таркибида фойдали бўлган микро ва макроэлементлар мавжуд. Шунинг учун ЎРВИ билан касалланганда малинали чой жуда фойдали ҳисобланади. У ҳар қандай касаллик вақтида ичилса, дам олишга ёрдам беради.

Керакли маҳсулотлар:

• қора чой — 3—4 ош қошиқ;
• қуритилган ялпиз — 1 чой қошиқ;
•  лимон пўсти — 1 чой қошиқ;
• малина — 2—3 ош қошиқ;
• асал.

Чойнакка ялпиз, лимон пўсти ва чой солинади. Устидан 2—2,5 стакан қайноқ сув қуйилади. 10—15 дақиқа қайнатилади. Идиш ичидан чой барглари олиниб, малина солинади ва 7—10 дақиқа қайнатилади. Тайёр бўлгач, чой стаканларга қуйилади ва таъбга кўра асал қўшилади.

Шифобахш суртма

Ушбу суртма бурун оқиши ва йўтални даволашда ёрдам беради. Шунингдек, табиий маҳсулотлардан тайёрланади ва мутлақо зарарсиздир. Лекин аллергияга мойил кишилар эҳтиёт бўлиши лозим. Шунинг учун маҳсулотдан фойдаланишдан аввал мутахассис билан маслаҳатлашган маъқул.

Керакли маҳсулотлар:

• асал муми — бир бўлак;
• чаканда мойи — 50 мл;
• зайтун мойи — 15 мл.

Чаканда мойи сув буғида қиздирилади. Шунингдек, уни бошқа ёғлар билан алмаштириш ҳам мумкин. Сўнгра унга зайтун мойи қўшилади. Ёғлар қайнамаслиги зарур. Устидан асал муми қўшилади. Маҳсулот тўлиқ эригандан сўнг яхшилаб аралаштирилиб, шиша идишга қуйилади. Тайёр бўлган малҳамни музлаткичда 10 ойгача сақлаш мумкин. Уни йўталда оёққа, кўкрак соҳасига, елка қисмига ва бурун атрофига суриш мумкин.

Цитрусли ичимлик

Маълумки, вирус ва бактериялар кислотали муҳитда йўқолади. Бундан ташқари, C витамини миқдори қанчалик юқори бўлса, грипп симптомлари тезроқ бартараф этилади. Бу исботланган ҳақиқат. Шунинг учун C витаминининг кони — цитрусларга мурожаат қилиш керак.

Керакли маҳсулотлар:

• қора чой — 3—4 ош қошиқ;
• қалампирмунчоқ — 5 дона;
• лимон — 2 бўлак;
• апельсин — 2 бўлак;
• лайм — 2 бўлак.

Идишга чой ва қалампирмунчоқ солинади, устидан 1,5—2 стакан сув қуйиб қайнатилади. Чой барглари олиниб, мевалар қўшилади ва паст оловда қайнатилади. Чой стаканларга қуйилади, агар қуюқ бўлса, сув ёрдамида суюлтириш мумкин.

Занжабилли чой

Ўзига хос таъмга эга чой томоқ оғришида жуда фойдали. Бундан ташқари, бурун битиши ҳамда шамоллашда терлашга ёрдам беради.

Керакли машулотлар:

• кўк чой — 3—4 ош қошиқ;
• долчин — 0,5 чой қошиқ;
• занжабил — 10-15 грамм;
• лимон — 2 бўлак;
• ёнғоқ, қизилмия, асал.

Чой ва зираворлар аралаштирилиб, 1,5—2 стакан сувда қайнатилади. Сўнгра занжабил ва лимон қўшилади ва яна бироз қайнатилади. Чой барглари олиниб, қайноқ сув билан суюлтиради. Таъбга кўра асал қўшилади.