Бугун, 12 июль соат 15:00 ҳолатига кўра, республиканиг бир қатор шаҳарларида ҳаво ҳарорати 40 даражадан ошди.
“Ўзгидромет” платформасида тақдим этилаётган ахборотда бир қатор шаҳарларда ҳарорат 40 даражадан юқори экани кўринади. Хусусан, Урганч, Навоий, Бухоро, Термиз ва Қарши шаҳарларида ҳаво ҳарорати 41–43 даража орқалиғида иссиқ бўлмоқда. Тошкент шаҳри ва Гулистонда 40,1 даражали жазирама кузатиляпти.
Нукус, Самарқанд, Нурафшон, Наманган, Андижон ва Фарғона шаҳарларидаги ҳаво ҳарорати 37,5 даражадан 39,9 даражагача иссиқ бўлмоқда.
Эслатиб ўтамиз, “Ўзгидромет” 12 июлда қандай об-ҳаво бўлишини маълум қилганди. Прогнозда республика бўйлаб ҳаво ҳарорати 37–45 даража иссиқ бўлиши қайд этилган. Маълум қилинишича, 13 июлда ҳаво ҳарорати 45 даражагача кўтарилади. 14–16 июль кунлари эса ҳарорат 35–42 даража оралиғида бўлади.
Аввалроқ жазирамадан сақланиш бўйича тавсиялар эълон қилинганди. Жумладан, узоқ вақт иссиқда қолмасликка ҳаракат қилиш, тана ва бошни тўғридан тўғри қуёш нурларидан ҳимоялашга уриниш лозим.
Кўп суюқлик ичиш, музлатгичдан муздек ичимликлар эмас, илиқ сув ёки энг яхшиси кўк чой ичиш тавсия этилади. Кўпроқ мева, сабзавотларни истеъмол қилиш, жуда аччиқ ва ёғли овқатларни истеъмол қилмасликка ҳаракат қилиш зарур. Совитиш мосламалари билан жиҳозланмаган дўконлардан маҳсулотларни харид қилмаган мақъул, Улар қуёшда қанча вақт бўлганини билмайсиз.
“Кондиционерли хонада бўлганингизда, тўғридан тўғри совуқ ҳаво оқими тагида ўтирманг ва кондиционерни 18 даражадан паст бўлмаган ҳароратга дастурланг. Юрак-қон томир касалликлари бор инсонлар дори-дармонларни қабул қилиш бўйича шифокор билан маслаҳатлашишлари керак” — дея маълум қилган “Ўзгидромет”.
Соғлиқни сақлаш вазирлиги эълон қилган тавсияларга кўра, иссиқ ҳавода табиий, ёрқин рангдаги, пахта матосидан бўлган кийимларни кийиш мақсадга мувофиқ. Мавсумга мос бундай либослар терининг нафас олишига имкон яратади, тана қизиб кетишининг олдини олади. Қолаверса, жазирама кунларда қаҳвадан воз кечган маъқул. Чунки у иссиқ кунда чарчоқни оширади.
Изоҳ (0)