Осиё ошхонаси саломатлик ҳамда ажойиб таъмни уйғунлаштириши билан бутун дунёга машҳур. Улар ҳаттоки мавсумга қараб инсон иммунитети учун фойдали бўлган ичимликларни тавсия қила олади. Марҳамат, совуқ ҳавода кони фойда ҳисобланган ичимликлар рецепти билан танишиб чиқинг.
Чакандали чой
Чаканда мевалари қўшилган чой – фойдали моддаларнинг ҳақиқий манбайи бўлиб, у иммунитет тизимини яхшилашда беминнат ёрдам беради. Чой ўзида нафақат А, B, C, омега-3, омега-6 витаминлари, балки ноёб шифобахш хусусиятларни ҳам таъминловчи таркибий қисмга эга.
Керакли маҳсулотлар:
- чаканда – 200 грамм;
- сув – 1000 мл;
- лайм/лимон/апельсин – таъбга кўра;
- шакар/асал – таъбга кўра;
- долчин – 1 та таёқча;
- чиннигул – таъбга кўра;
- ялпиз – ихтиёрий.
Чаканда мевалари яхшилаб ювилади, сувга солиниб, 5 дақиқа давомида қайнатилади. Сўнгра мевалар яхшилаб эзилади, устидан майда тўғралган цитруслар қўшилади. Тайёр бўлган ичимликка шакар ёки асал, долчин, чиннигул ва ялпиз солинади.
Қалампирли чой
Қалампирли чой фойдали моддаларга тўла бўлиб, қалампирни ўрта меъёрда истеъмол қилиш танага ижобий таъсир ўтказади. Масалан, қон айланиши яхшиланади, меъда шираси секрециясини оширади, жигар яхши ишлашини таъминлайди. Қалампирни кўк чой билан бирга ичиш жуда яхши натижа кўрсатади. Сабаби қалампир таркибидаги капсаицин ва чой баргларида полифеноллар бактериал ва вирусли инфекцияларга қарши курашувчи, шунингдек, саратон ривожланишининг олдини олувчи иккита кучли антиоксидант мавжуд.
Керакли маҳсулотлар:
- кўк чой;
- аччиқ қизил қалампир.
Майдаланган аччиқ қалампир чой қошиқнинг учида қайноқ чойда эритилади, яхшилаб аралаштирилади. Чойга бирданига кўп миқдорда қалампир қўшиш тавсия этилмайди, сабаби организм таъмга мослашиши керак. Кейинчалик уни таъбга кўра қўшиш мумкин.
Олма ва райҳонли смузи
Олма ва райҳон чиндан ҳам ноёб маҳсулотлар бўлиб, ўзида бир неча фойдали элементларни сақлайди. А, B2 витаминларидан тортиб, калий, фосфор, рух ва темиргача. Ушбу элементлар нафақат юқумли касалликларга қарши курашади, балки ҳазм қилишни таъминлайди, мия фаолиятини рағбатлантиради ва ортиқча холестеринни йўқотади.
Керакли маҳсулотлар:
- олма – ½ бўлак;
- лимон шарбати – 20 грамм;
- шакар сиропи – 20 грамм;
- райҳон – 4 барг;
- минерал сув – 50 мл.
Олмалар тозаланади, бўлакларга бўлиниб, блендр ёрдамида майдаланади. Устидан лимон шарбати, шакар сиропи, минерал сув ва райҳон қўшилади. Стаканларга қуйилиб, олма бўлаги ва райҳон билан безак берилади.
Изоҳ (0)