BMT Taraqqiyot dasturi doirasida Toshkent shahar jamoat transportida elektrobuslardan foydalanish va infrastrukturani rivojlantirish bilan bog‘liq loyiha amalga oshirilmoqda. Bu haqda Transport vazirligi axborot xizmati “Daryo”ga ma’lum qildi.
Aytilishicha, “Toshkent – past uglerodli transportga investitsiyalarni jadallashtirish” (TAILEV) loyihasi amalga oshirilmoqda. Mazkur masala yuzasidan BMT Taraqqiyot dasturining O‘zbekistondagi doimiy vakili Akiko Fujii transport vaziri bilan uchrashgan.
Shuningdek, BMT TD vakillari Toshkent shahridagi 8-avtobus saroyiga tashrif buyurib, elektrobus parki hamda ularni quvvatlash infratuzilmasi bilan tanishgan. Tadbirda Akiko Fujii xonim “Toshshahartransxizmat” aksiyadorlik jamiyati tomonidan xarid qilingan elektrobuslarning bir qismi Global Ekologik Jamg‘armaning grant mablag‘lari hisobidan qisman moliyalash uchun 1 million 220 mi dollar mablag‘i sertifikatini top.
Ma’lumot uchun, “Toshshahartransxizmat” AJ avtobus saroyi filiallarida 2 ming 17 dona harakat tarkibi mavjud. Shundan 672 donasi dizel yoqilg‘isida (33 foiz), 1 ming 20 donasi tabiiy gaz yoqilg‘isida (50 foiz), 324 donasi elektr energiyasida (17 foiz) harakatlanadi. 2022—2023-yillarda sotib olingan avtobuslarning 58,7 foizi siqilgan tabiiy gazda, 21,4 foizi elektr energiyasida harakatlanadi.
Natijada harakat tarkibining o‘zidan chiqadigan zararli moddalar miqdori 2022-yilda 5,1 ming tonnani, 2023-yilda 4,8 ming tonnani tashkil etgan. 2024-2030-yillarda qo‘shimcha 1 200 dona elektrobus xarid qilish va avtobuslarni tabiiy gaz yoqilg‘isiga o‘tkazish ko‘zda tutilgan.
Shavkat Mirziyoyev 2023-yilning sentabr oyida Xitoyning yetakchi BYD kompaniyasi prezidenti va asoschisi Van Chuanfu boshchiligidagi delegatsiyani qabul qilgandi. Uchrashuvda kompaniyaning O‘zbekistondagi faoliyatini kengaytirishning amaliy jihatlari, xususan, Jizzax viloyatida gibrid va elektr avtomobillar ishlab chiqarishni tez fursatda yo‘lga qo‘yish hamda keyingi bosqichlarda uning quvvatini 300 ming donaga yetkazish masalalari ko‘rib chiqilgan.
Oktyabr o‘rtalarida esa Toshkent hokimligi Xitoyning BYD avtomobil ishlab chiqaruvchi kompaniyasi bilan 2000 ta elektrobus sotib olish bo‘yicha ramka shartnomasini imzolagandi.
Izoh (0)