Самарқанд вилояти ИИБ матбуот котиби Жаҳонгир Сагдуллаев автобуснинг тошбўрон қилиниши тасвирланган видеога муносабат билдирди.
Ижтимоий тармоқларда давлат рақам белгилари ечилган бир нечта енгил машина серқатнов автомобиль йўлида автобус йўлини тўсгани тасвирланган видео тарқалди. Машинадан тушган шахслар қўлларида тош билан автобусга шикаст етказган.
Сагдуллаевга кўра, Оқдарё тумани ҳудудидан ўтувчи йўлда бир гуруҳ фуқаролар йўловчи ташувчи автобус йўлини тўсиб, ойнасига тош отгани ҳолатининг сабаблари вилоят ИИБ томонидан ўрганилмоқда.
“Ўрганишлар якуни билан ушбу ҳолатда иштирок этган барча шахсларнинг ҳаракатларига ҳуқуқий баҳо берилади”, — деб ёзади у.
Бундан олдин Тошкент шаҳри Яккасарой туманида 30 га яқин йигит иштирокида оммавий жанжал содир бўлгани, Самарқандда оммавий жанжал содир бўлгани акс этган видеога изоҳ берилгани, Фарғонада сув талашиб, танишини тошбўрон қилган шахсларга нисбатан жиноий иш очилгани тўғрисида хабар берилганди.
Изоҳ (0)