“Тошшаҳартрансхизмат” АЖ Тошкент вилояти ҳудудида ҳаракатланаётган автобусда йўловчи аёлнинг тўлғоғи тутиб қолгани юзасидан тарқалган хабарларга муносабат билдирди.
Ижтимоий тармоқларда Saz Le-60 русумли автобус Тошкент вилояти ҳудудида ҳаракатланаётган вақтда йўловчи аёлнинг тўлғоғи тутиб қолгани ҳақида хабарлар тарқалди.
Қайд этилишича, ижтимоий тармоқларда акс этган ушбу ҳолат фильмни тасвирга олиш жараёнида амалга оширилган саҳналаштирилган ҳолат ҳисобланади.
2024 йил 16 март куни “Тошшаҳартрансхизмат” АЖ ва С. Герасимов номидаги Бутунроссия давлат кинематография университети билан тузилган меҳнат шартномасига асосан, фильмни суратга олиш жараёни учун “1-автобус саройи” филиалига тегишли бўлган Saz Le-60 русумли автобуси ажратилган.
Фильмни суратга олиш жараёнида хавфсизлик чоралари кўрилган бўлиб, ҳеч бир фуқаро жабрланмаганини маълум қиламиз. Ижтимоий тармоқ фаолларидан ушбу ҳолатни нотўғри талқин қилмасликларини сўраймиз, — дейилади муносабатда.
Эслатиб ўтамиз, 2020 йилда Тошкент шаҳар ИИББ Пoст патрул хизмати бригадаси ходимларининг хизмат машинасида чақалоқ дунёга келганди.
Изоҳ (1)
Ассалому Алайкум!!! Автобусда кетаётган аёлнинг тулгоги тутиб колди эмас. аёлни тулгок тутиб колли булади