Ижтимоий тармоқларда автобуснинг ҳалокатга учрагани ва ундаги йўловчилар эвакуация қилингани билан боғлиқ видео кўплаб шов-шувларга сабаб бўлганди. Хайриятки, бу воқеалар реал ҳаётда эмас, балки “Уч қаҳрамон” фильмининг суратга олиш жараёнида содир бўлди. “Дарё” журналисти Насиба Абдуҳамидова фильмнинг суратга олиш жараёнларида иштирок этиб, видеорепортаж тайёрлади.
Картина Ўзбекистон Республикаси Ички ишлари вазирлиги жамоат хавфсизлиги департаменти ва Ўзбекистон Кинематографияси агентлиги буюртмасига кўра суратга олинмоқда. Тўлиқ метраждаги фильм бугунги кунда сидқидилдан хизмат қилаётган ички ишлар ходимларининг ҳаёти ҳақида ҳикоя қилади.
— Фильм ўткир драма жанрида бўлиб, жанговар саҳналарга бой. Фильм воқеалари бугунги кунда бўлиб ўтади. Жамоадаги ижодкорларнинг бари ёшлардан таркиб топган. Уч қаҳрамонимиз ҳам қандайдир “супергерой”лар эмас, балки оддий ходимлардир. Суратга олиш ишлари бир ойдан буён давом этяпти, шу вақт оралиғида кўплаб мураккаб эпизодларни тасвирга олдик, — дейди фильм режиссёри Шоҳрух Расулов.
Фильмда Киану Ривз, Силвестер Сталлоне, Арнолд Шварсенеггер, Jet Ли, Николас Кейж, Семуэл Л. Жексон, Хоакин Феникс ва яна бошқа бир қатор дунё юлдузлари билан ҳамкорликда ишлаган халқаро мутахассислар ҳам суратга тушмоқда. Яъни унда қозоғистонлик машҳур “Nomad stunts” каскадёрлар жамоаси билан ҳамкорлик йўлга қўйилган. Канат Кудяров бошчилигидаги йигитлар мураккаб трюклар ишонарли чиқиши учун меҳнат қилишмоқда.
.jpg)
Албатта, бу жанрдаги фильм машаққатсиз суратга олинмайди. Трюкларни бажариш вақтида актёрлар кичик жароҳатлар ҳам олишди.
.jpg)
Фильмда Улуғбек Қодиров ва Шоҳрух Ҳамдамовдан ташқари кўплаб ёш истеъдод вакиллари суратга тушишмоқда.
“Дарё” мухбирлари репортаж тайёрлаган кун ҳаракатланаётган юк машинаси устидаги жанг саҳналари суратга олинаётганди. Улуғбек Қодиров мураккаб эпизодни бажараётгани учун интервью беришни истамади.
Изоҳ (0)