Ўзбекистоннинг савдо-иқтисодий делегацияси Кобулга ташриф буюрди. Бу ҳақда Толибон ҳаракатининг саноат ва савдо вазирлиги хабар берди.
Ўзбекистон бош вазири ўринбосари Жамшид Ходжаев делегацияга бошчилик қилмоқда. Ташрифдан мақсад ўзаро савдони ривожлантириш, икки давлат ўртасидаги транзит муаммоларига ечим топиш ва Кобулда Ўзбекистон товарлари кўргазмасини очишдан иборат. Делегацияни аэропортда “Толибон” савдо вазири Нуриддин Азизий кутиб олган.
Делегация таркибида Ўзбекистон президентининг Афғонистон бўйича махсус вакили Исматулла Иргашев, транспорт вазири Илҳом Маҳкамов, қишлоқ хўжалиги вазири Иброҳим Абдураҳмонов, энергетика вазири Жўрабек Мирзамаҳмудов ва бошқа амалдорлар бор.
Аввалроқ 30 кишилик Ўзбекистон делегацияси “Толибон” расмийлари билан мулоқот қилиш учун Кобулга борганди. Ўшанда “Толибон” ўзбек расмийларининг ташрифидан мақсад “Афғонистон ва Ўзбекистон ўртасидаги савдо-иқтисодий алоқаларни кенгайтириш” эканини билдирган.
Изоҳ (0)