Саудия Арабистони валиаҳд шаҳзодаси Муҳаммад бин Салмон Ол Сауднинг огоҳлантиришича, агар Жо Байден маъмурияти қиролликни нефть нархи чегарасини белгилаш сиёсати учун жазоламоқчи бўлса, АҚШни даҳшатли иқтисодий оқибатлар кутади. Бу ҳақда Washington Post нашри хабар бермоқда.

2022 йил октябрь ойида АҚШ президенти Жо Байден Саудия Арабистони ОPEK+ ташкилотига аъзо давлатларнинг кунлик нефть қазиб олишни икки миллион баррелга қисқартириш бўйича келишуви шартларини қабул қилганидан норозилигини билдирганди.

“Улар (Ар-Риёд) Россия билан амалга оширган ишларнинг оқибатлари бўлади”, — деган Байден CNN телеканалига берган интервьюсида ва бунинг учун Конгресс билан ҳамкорликда чора кўришини қўшимча қилган. Ўшанда New York Times журналистлари Саудия Арабистони АҚШ билан нефть қазишни кўпайтириш бўйича махфий келишувларни бузганини айтди.

WP нашрига кўра, АҚШ президентининг оммавий таҳдидларидан сўнг, Саудия шаҳзодаси агар Вашингтон ҳақиқатан ҳам жавоб чораларини қўлласа, бу “йирик иқтисодий оқибатлар” келтириши билан таҳдид қилган ҳамда “АҚШ маъмурияти билан энди муомала қилиб ўтирмаслигини” айтган.

Оқ уй Саудия Арабистонидан бундай таҳдидлар бўлгани ҳақида эшитмаганини айтди. Расмийларнинг айтишича, ОАВга ошкор бўлган ҳужжатларнинг “тарихи узун, улар ҳозирги вазият ҳақида тўлиқ тасаввур бера олмайди”.