AQSH prezidenti Jo Bayden Florida shtatiga ta’sir qilayotgan kuchli “Milton” to‘foni sababli Germaniyaga shu haftaga rejalashtirilgan tashrifini qoldirdi.
Ma’lum qilinisha, bundan tashqari Baydenning Germaniyadan keyin parvoz qilishni rejalashtirgan Angolaga safari ham keyinga qoldirilgan. AQSH yetakchisi ushbu safarlarni qachon amalga oshirishi haqida ma’lumot berilmagan.
Ayni paytda Germaniya hukumati vakili Shteffen Hebeshtrayt Baydenning tashrifini kechiktirish qaroridan afsusda ekanini bildirgan.
“Biroq, federal hukumat Floridadagi vaziyatni albatta tushunadi”, deya qo‘shimcha qildi u.
Hebeshtreytning so‘zlariga ko‘ra, Oq uy qarori haqida avvalroq Germaniya rasmiylarini xabardor qilgan.
AQSH prezidentining tashrifi dastlab 10—12-oktyabr kunlariga rejalashtirilgandi. Berlinda u Germaniya kansleri Olaf Shols va Germaniya federal prezidenti Frank-Valter Shtaynmayer bilan uchrashishi kutilayotgan edi.
Shundan so‘ng Bayden Ukrainaga harbiy yordam ko‘rsatish bo‘yicha koalitsiyaning navbatdagi yig‘ilishi bo‘lib o‘tishi kerak bo‘lgan Germaniya g‘arbidagi Ramshteyn aviabazasiga tashrif buyurish niyatida bo‘lgan.
Ma’lumotlarga ko‘ra, so‘nggi soatlarda “Milton” to‘foni biroz zaiflashgan va hozirda 4-toifali bo‘ronga aylangan. Shamol tezligi taxminan 230 km/soatni tashkil etmoqda. AQSH Milliy dovullar markazi bu “Florida qirg‘oqlariga yopiriladigan o‘ta xavfli bo‘ron” ekanligini aytgan.
Izoh (0)