Шимолий Корея етакчиси Ким Чен Иннинг 12 сентябрь куни Россияга бошлаган ташрифи ниҳоясига етди. 17 сентябрь куни у Владивостокдаги университетга ташриф буюриб, қулоқчали телпакда расмга тушди, Приморский аквариумига ташриф буюрди, шунингдек, совғалар олди.
Ким Чен Ин Владивостокдаги Узоқ Шарқ федерал университетига ташриф буюрган. У ерда Шимолий Кореядан келган 43 нафар талаба таҳсил олмоқда. Ким улар билан учрашув ўтказган. Учрашув якунига кўра, КХДР етакчисига оролнинг релефи акс эттирилган “Россия ороли” барелеф картинаси совға қилинган.
Ташриф доирасида Шимолий Корея етакчиси Русский оролидаги Приморский аквариумига борган. У денгиз сутемизувчилари спектаклини томоша қилган.
Айни пайтда Россиянинг Приморск ўлкаси губернатори Ким Чен Инга броножилет ва бошқарув тизимига эга олтита дрон совға қилди. Шунингдек, унга Россия Мудофаа вазири Сергей Шойгу ҳам совғалар топширган.
Ўз навбатида Ким ҳам Россия Тинч океан флотига совға тақдим этган. Булар қандай совғалар экани очиқланмаган. КХДР давлат марказий телеграф агентлиги (KCNA) Шимолий Корея етакчиси телпак кийган ҳолда Шойгу билан тушган суратини эълон қилган.
Ким Россияга ташрифини Приморедаги вокзалда якунлаган.
Шимолий Корея етакчисининг Россияга ташрифи
Ким Чен Ин 12 сентябрь куни Россияга ташриф буюрди, бу унинг 2019 йилдан бери биринчи ташрифидир. Эртаси куни у Россиянинг Узоқ Шарқидаги “Восточний” космодромида Россия президенти Владимир Путин билан учрашди.
Учрашувдан кейин Путин Шимолий Корея етакчиси билан музокаралар самарали кечганини айтди. Унинг айтишича, Ким Чен Ин билан минтақадаги вазият ва икки томонлама муносабатлар юзасидан очиқ фикр алмашган. Бундан ташқари, давлат раҳбарлари музокараларда тактик ва стратегик ҳамкорлик, Корея ярим оролидаги вазият ва Европа Иттифоқидаги вазиятни ҳам муҳокама қилдилар.
Изоҳ (0)