АҚШ президенти Жо Байден икки нафар энг яқин маслаҳатчиси билан учрашувдан сўнг қайта сайланиш уринишидан воз кечишга қарор қилди. Бу ҳақда Politico хабар берди.
Байден 21 июль куни иккинчи муддатга сайланмаслигини эълон қилган эди. У ўз вице-президенти Камала Ҳаррис номзодини қўллаб-қувватлашини айтган. Республикачилар партиясидан номзод Дональд Трамп Ҳаррисни мағлуб этиш унга анча осон бўлишини бир неча бор таъкидлаган.
Politico’га кўра, 20 июль куни Байден ўз штаб-квартирасига сайлов кампанияси қизғин паллада эканини айтган. У икки нафар энг яқин ёрдамчиси билан узоқ суҳбатдан кейин ўз позициясини ўзгартирган. Манбаларга кўра, Майк Донилон ва Стив Рикетти Байденнинг Делавердаги уйига келган. Донилон Байденнинг бош сиёсий стратеги ва нутқ муаллифи ҳисобланади.
Донилон ва Рикетти Байденга унинг тўхтаб қолган маблағ йиғиш кампанияси ҳақида маълумот берган ва ноябрдаги сайловларда ғалаба қозонишнинг иложи йўқлигини тасдиқловчи жамоатчилик сўровномаларини тақдим этган.
The Wall Street Journal’нинг ёзишича, айнан Донилон ва Рикетти Байденнинг президентлик пойгасидан чиқиши ҳақидаги баёнотни тайёрлашга ёрдам берган.
Изоҳ (0)