Мексика президенти Андрес Мануэль Лопес Обрадор, агар Владимир Путин октябрь ойида Мексиканинг навбатдаги президенти Клаудия Шейнбаумнинг инаугурациясида иштирок этса, расмийлар уни ҳибсга олмаслигини маълум қилди.
Путинни ҳибсга олиш учун ордер Мексика аъзо бўлган Халқаро жиноий суд (ХЖС) томонидан берилган эди.
Обрадор инаугурация таклифномалари Мексика билан дипломатик алоқаларга эга бўлган барча давлатлар раҳбарларига юборилганини таъкидлаган. Ундан мазкур тадбирга Россия президенти ташриф буюрган тақдирда ХЖС буйруғи асосида унинг ҳибсга олиниш эҳтимоли сўралган.
“Биз буни қила олмаймиз, бу бизнинг ишимиз эмас”, деб жавоб берган Мексика президенти матбуот анжуманида.
Обрадорга кўра, Мексика Россия ва Украинага келишувга эришишни таклиф қилган.
“Биз урушга қаршимиз, биз тинчлик тарафдоримиз. Ўз вақтида мен Ҳиндистон бош вазири Моди, Рим папаси ва БМТ бош котибига урушни тўхтатиш учун алоқа ўрнатиб, келишув излашга чақиришни таклиф қилгандим”, дея қўшимча қилган у.
ХЖС 2023 йилнинг 17 март куни Путинни ҳибсга олишга ордер берган эди. Судга кўра, Россия президенти Украинадан “аҳоли (болалар)ни ноқонуний равишда депортация қилиш билан боғлиқ уруш жиноятлари” учун жавобгар бўлиши мумкин. Россия президенти бу йил ХЖС аъзоси бўлган Бразилия раислигида бўлиб ўтадиган “Катта йигирматалик”нинг ноябрдаги саммитига ҳам таклиф қилинган. Бразилия президенти Лула да Сильванинг айтишича, Владимир Путин ташрифи оқибатларини ўзи баҳолаши керак.
Изоҳ (0)