Flightradar24 сервиси маълумотларига кўра, 11 июль куни НАТО саммити бошланадиган Вильнюсга Американинг “Қиёмат куни” деб номланувчи Boeing 747-E4B самолёти қўнди. Самолёт бир кун аввал Мериленд штатидаги Кемп-Спрингс шаҳридан (у ерда Американинг Эндрю авиабазаси жойлашган) ҳавога кўтарилиб, сешанба куни эрталаб Литва пойтахтига қўнди. Лайнер тўққиз соатдан кўпроқ парвоз қилди.
Boeing E-4B Nightwatch самолёти шунингдек, АҚШ Ҳаво кучлари ҳаво қўмондонлиги пости (Advanced Airborne Cоmmand Post — AACP) сифатида машҳур. Лайнер Boeing 747-200 нинг ўзгартирилган версиясидир. 1970 йиллардан бери АҚШда жами тўртта шундай самолёт ишлаб чиқарилган, деб таъкидлайди Business Insider.
Самолёт Америка қўмондонлигига стратегик ва ностратегик қуроллар, хусусан, ядро арсенали билан боғланиш имконини беради. Бунинг ёрдамида бортдаги бошқариш тизими орқали ердаги баллистик ракеталарни учириш мумкин.
Уч қаватли E-4B Nightwatch 112 кишини сиғдира олади. Ўрта палуба “қўмондонлик маркази” бўлиб, ундан президент ва бошқа юқори мартабали амалдорлар ядро қуролидан фойдаланиш эҳтимоли юзага келган тақдирда, АҚШ ҳаракатларини мувофиқлаштириш учун ўтириши мумкин, деб ёзди Newsweek. Бу ерда қўмондонлик зонаси, конференция зали, брифинг зали, алоқа зонаси ва дам олиш маскани мавжуд.
Самолёт тўртта двигателга эга, унга ҳавода туриб ёнилғи қуйиш мумкин, лайнер парвозда бир неча кун (ёнилғи қуймасдан — 12 соат) туришга қодир. BI маълумотларига кўра, E-4B парвози соатига қарийб 160 000 долларга тушади.
АҚШ президенти Жо Байден 10 июль куни кечқурун Вильнюсга Air Force One самолётида келди. Бунгача Америка раҳбари Буюк Британияга ташриф буюрган ва у ерда қирол Чарльз III билан учрашган. 12 июлгача давом этадиган НАТО саммити доирасида Байден Украина президенти Владимир Зеленский билан музокара ўтказиши кутилмоқда.
Изоҳ (0)