Италия Яқин Шарқдаги вазият ривожини диққат билан кузатиб, минтақа раҳбарларини вазминлик кўрсатишга ҳамда можарони юмшатишга чақирмоқда, дея Euronews хабар берди.
Италия ТИВ раҳбари Антонио Таяни тўрт мингга яқин италиялик Ливанда эканлигини ва ҳукуматнинг вазифаси уларнинг ҳимоясини таъминлаш эканини эслатган. Расмийлар, шунингдек, ватандошларига Ливанни тарк этишни тавсия қилган.
Вазият Теҳронда ҲАМАС етакчиси Исмоил Ҳания ва Байрутдаги “Ҳизбуллоҳ” қўмондонларидан бири Фуад Шукр ўлдирилганидан кейин янада кескинлашган. Ҳар икки томон бунда Исроилни айблаган ва қасос олишга ваъда берган. Парламентнинг ташқи ишлар қўмитаси аъзоси Эмануэл Лоперфидо геосиёсий кескинлик даражасини ниҳоятда юқори деб атаган.
“Биз бундай кескин вазиятга доим ҳам дуч келавермаймиз. Бугун Россия Эронга қурол жўнатаётганини эсласак, бу бизникига қарама-қарши фронт борлигини яққол кўрсатади. Халқаро ҳуқуқни ҳурмат қиладиган ва ҳужум қурбонларини ҳимоя қилишга, тинчлик ва демократияни ривожлантиришга сармоя киритишга содиқ бўлган Ғарб тинчликка эришишни таъминлаши керак. Бу Мелони ҳукуматининг миллий, Европа ва халқаро даражадаги саъй-ҳаракатларининг бир қисмидир”, дейди Лоперфидо.
Шунингдек, Италия мухолиф партиялари Фаластин давлатини тан олиш масаласида ҳукуматни ҳам танқид қилган.
“Бизнингча, бу ҳукумат қўрқоқ! Унда Фаластин давлатини тан олиш ва бу жанговар ҳаракатларни тугатиш учун учта имконият бор эди, лекин БМТ Бош ассамблеяси буни амалга ошира олмади. Улар қўрқоқлик қилдилар”, дея таъкидлаган “Беш юлдуз” ҳаракати етакчиси Жузеппе Конте.
Изоҳ (0)