“Ал-Ҳилол” Антуан Гризманни сотиб олишга яқин турибди

Франциялик ҳужумчи Антуан Гризманн Мадриднинг “Атлетико” клубини тарк этиши мумкин. Бунга асосий сабаб — футболчига Саудия Арабистонидан жиддий таклиф тушмоқда. Бу ҳақда Fichajes нашри хабар берди.

Манбага кўра, Саудия Арабистонининг “Ал-Ҳилол” клуби Гризманнга жиддий қизиқиш билдирмоқда. Риёдликлар бош мураббийи Симоне Индзаги 2018 йилги Жаҳон чемпиони орқали жамоа ҳужум чизиғини кучайтиришни режалаштирган. Саудия клуби футболчи учун 20 миллион евролик таклиф тайёрламоқда. “Атлетико” эса янги футболчиларни харид қилиш учун Гризманндан воз кечиш масаласини кўриб чиқаётгани айтилмоқда.

Гризманн яқинда “матрасчилар” билан шартномасини 2027 йилгача узайтирган бўлса-да, жамоадаги ўзгаришлар унинг ўйин амалиётига салбий таъсир кўрсатиши мумкин. Тиаго Алмада ва Алекс Баэна каби янги футболчиларнинг жамоага қўшилиши, шунингдек, Жакомо Распадори билан олиб борилаётган музокаралар фонида Антуаннинг клубдан кетиш эҳтимоли ортиб бормоқда.

“Ал-Ҳилол” Гризманнга “Атлетико”да оладиган маошидан юқорироқ миқдор таклиф қилиши мумкин. Бу омил футболчининг қарорига таъсир кўрсатиши мумкинлиги таъкидланмоқда. Сўнгги вақтларда Саудия Про лигасига кўплаб юқори даражадаги футболчилар йўл олгани ҳам Гризманннинг фикрини ўзгартиришига сабаб бўлиши эҳтимолдан холи эмас.

Маълумот учун, Антуан Гризманн ўтган мавсумда “Атлетико” сафида жами 56 та ўйинда майдонга тушиб, 17 та гол ва 9 та голли узатма муаллифига айланган. Transfermarkt портали унинг қийматини 18 миллион еврога баҳоламоқда.