Россия президенти Владимир Путиннинг 140 метрлик “Шаҳризода” яхтаси Италиядаги қуруқликдан ғойиб бўлди. Мухолифатчи Алексей Навалнийнинг ҳамроҳлари Италия ҳукуматига мурожаат қилиб, кема “қочиб кетиши”нинг олдини олишга чақирди.
“Шаҳризода” яхтаси сувга қўйиб юборилгани ҳақида биринчи бўлиб eSysman SuperYachts саноат канали хабар берди. “Досье Маркази”нинг суриштирув олиб борувчи журналистлари, Британиянинг The Sun таблоиди ва Навалнийнинг Коррупцияга қарши фонди Путинни суперяхтанинг якуний эгаси деб атайди.
Бир қатор суд жараёнларидан сўнг, 2022 йилнинг май ойида Италия расмийлари қиймати тахминан ярим миллиард еврога тенг 140 метрлик яхтани ҳибсга олганди. Энди эса унинг излари йўқолмоқда.
“Агар Италия ҳукумати бирор-бир сабабга кўра ‘Шаҳризода’га қочишга рухсат берса, бу тасаввур қилинадиган энг катта шармандаликка олиб келади. Европа Иттифоқининг санкциялар сиёсатига энг жиддий зарбадир. Бу содир бўлиши мумкин эмас. Сиз Путинга яхтасини қайтариб бера олмайсиз, бу шунчаки ақлдан озиш”, — деб ёзган Навалнийнинг ҳамроҳи Мария Певчих.
YouTube’даги eSysman SuperYachts саноат канали муаллифлари яхта жойлашган портга учинчи ёки тўртинчи бор ташриф буюрган. Ўшанда улар яхтада ўзгаришлар сезилганини, у таъмирдан ўтаётганини тахмин қилган.
“Бу ғалати, чунки кема музлатиб қўйилган, шунинг учун назарий жиҳатдан бундай бўлмаслиги керак-ку?”, — дейди улар.
“Шаҳризода” яхтаси сўнгги 18 ой давомида қуруқликда бўлган.
Изоҳ (0)